ზუგდიდის რაიონული სასამართლოს გადაწყვეტილებას, რომლის თანახმადაც მოსამართლე ირაკლი აბშილავამ ენმ-ის პოლიტსაბჭოს წევრი ანა წითლიძე და პარტიის პრესსამსახურის უფროსი გიორგი პატარაია ადმინისტრაციულ სამართალდამრღვევად ცნო და მათ 2000-2000 ლარის ოდენობით ჯარიმის გადახდა დააკისრა, ოპოზიცია პოლიტიკურ "ფარსს" უწოდებს. სხდომის დასრულების შემდეგ ზუგდიდის საკრებულოს ფრაქცია „ენმ“-ის თავმჯდომარემ ანა წითლიძემ ჟურნალისტებს უთხრა, რომ მათი დაკავებიდან დაწყებული პროცესი „ფარსია“ და მხოლოდ პოლიტიკურ დევნას ემსახურება.

„კიდევ ერთხელ გამოჩნდა, რომ მურუსიძის და ჩინჩალაძის სასამართლოა აქ და რაც ვიხილეთ, არის კომედია. მთელი ეს პროცესი იყო ჩვეულებრივი ფარსი, რომელიც ემსახურება პოლიტიკური ოპონენტების დევნას და საარჩევნო კამპანიისთვის ხელი შეშლას. მოსამართლეები არიან პოლიტიკური გადაწყვეტილებების მიმღები პირები და სადაც უნდა გავასაჩივროთ, არ ვიცი, რამდენად ექნება აზრი“, - თქვა წითლიძემ.

გადაწყვეტილებას არ ეთანხმება გიორგი პატარაიაც.

„არცერთი არგუმენტი და ფაქტი იმის დასადასტურებლად, რომ რომელიმე ჩვენგანმა რამე სამართალდარღვევა ჩაიდინა, არ წარმოუდგენიათ. ეს იყო პოლიტიკური გადაწყვეტილება და ძალიან სამწუხაროა, რომ ხელისუფლება ადამიანებს მხოლოდ დაშინებით, ტყუილებით ესაუბრება, თუმცა მათ ეს არ გამოუვათ. ზუგდიდელები პასუხს გასცემენ „ქართულ ოცნებას“ 19 მაისს“, - უთხრა ჟურნალისტებს პატარაიამ.

თავის მხრივ, ზუგდიდის რაიონული პოლიციის უბნის ინსპექტორების განყოფილების უფროსის შალვა ჭედიას თქმით, შინაგან საქმეთა სამინისტრომ ყველა მტკიცებულება წარადგინა და მოსამართლემაც შესაბამისი გადაწყვეტილება მიიღო.

„აბსოლუტურად ყველა მტკიცებულება ჩვენ მიერ წარდგენილი განიხილა სასამართლომ და მიიღო გადაწყვეტილება. შსს ყველა მსგავს ფაქტზე, როდესაც კონკრეტული პირები ხელს შეუშლიან პოლიციას საქმიანობის განხორციელებაში, მოახდენს სამართლებრივ რეაგირებას“, - აღნიშნა ჭედიამ.

კითხვაზე, რატომ არ წარუდგინეს გიორგი პატარაიას დაკავების ოქმი, ჭედიამ აღნიშნა, რომ პატარაიას დაკავების მომენტში უთხრეს, რომ ის დაკავებული იყო და საკუთარი უფლებებიც განუმარტეს.

პროცესი ზუგდიდის რაიონულ სასამართლოში, დაახლოებით, ორი საათის განმავლობაში მიმდინარეობდა. სხდომაზე ფოტო და ვიდეომტკიცებულებები განიხილეს, რომელიც 11 აპრილს ნარაზენში მომხდარ ინციდენტს ასახავდა.

ბრალდების მხარის მტკიცებით, მტკიცებულებებით დასტურდება, რომ გაერთიანებული ოპოზიციის წევრები, რომელთა შორის, სამართალდამცავების თქმით, განსაკუთრებით ანა წითლიძემ გიორგი პატარაია და მანუჩარ ჩხეტია აქტიურობდნენ, აგრესიულად იქცეოდნენ და პოლიციას შეურაცხმყოფელი სიტყვებით მიმართავდნენ. მათივე თქმით, დაკავებამდე მათ სამართალდამცავებს წინააღმდეგობა გაუწიეს.

„ყველა მათი სიტყვა იყო პოლიციის დამცირება. მაგალითად, იყო ასეთი რეპლიკა: სად გაქვს მაგის გამბედაობა, რომ დაგვაკავოთ და ასე შემდეგ. ასევე, ქალბატონი წითლიძე იჯდა პოლიციელების მანქანაზე და მათ არ აძლევდა გადაადგილების საშუალებას“, - თქვეს პროცესზე სამართალდამცავებმა.

აღნიშნულ ბრალდებებს კატეგორიულად არ დაეთანხმნენ თავად პატარაია და წითლიძე და გამომძიებლებს სთხოვეს, წარედგინათ კონკრეტული ფაქტები, სადაც შეურაცხმყოფელი სიტყვები ისმის ან წინააღმდეგობის გაწევა იკვეთება.

„ანა წითლიძე ცდილობდა, რომ, როგორც შემდეგ გაირკვა, პოლიციელები, რომლებიც უთვალთვალებდნენ, არ წასულიყვნენ ადგილიდან, რადგან მათ არ ისურვეს საკუთარი ვინაობა გაემხილა. სწორედ ამიტომ გამოიძახა პოლიცია ანა წითლიძემ. რაც შეეხება პატარაიას, კადრებშიც ჩანს, რომ ის არათუ აგრესიით გამოირჩევა, არამედ, პირიქით, ამშვიდებს პოლიციელს და ეუბნება, რომ „ძველი ბიჭივით“ არ მოიქცეს“, - თქვა ენმ-ის წევრების ადვოკატმა მირანდა გოგოხიამ.

საბოლოოდ, მოსამართლე ირაკლი აბშილავამ განმარტა, რომ წარმოდგენილ მტკიცებულებებში ის წვრილმანი ხულიგნობისა და პოლიციისადმი დაუმორჩილებლობის ნიშნებს ხედავს და სარეზოლუციო ნაწილი ადგილზე გამოაქვეყნა.

ნარაზენში 11 აპრილს დაკავებული მანუჩარ ჩხეტიას საქმეზე კი გადაწყვეტილება ხვალ, 19 აპრილს გახდება ცნობილი.