ზუგდიდის მეექვსე საჯარო სკოლის გარდაცვლილი დირექტორის შვილის ბაჩანა შენგელიას თქმით, საგამოძიებო უწყებას საქმესთან დაკავშირებით მთავარი პირები არ დაუკითხავს.  შენგელია ამბობს, რომ გამოძიება მცდარი მიმართულებით მიდის და მოქმედებების უმრავლესობა ფორმალურია.

„საქმე ეხება პოლიტიკური ნიშნით ადამიანის დევნას, სამსახურებრივი მდგომარეობის ბოროტად გამოყენებით, რამაც მისი გარდაცვალება გამოიწვია და ამ საქმეზე არ არის გამოკითხული ფორმალურადაც კი, საქმის მთავარი ფიგურანტი მინისტრი მიხეილ ბატიაშვილი. სავარაუდო დანაშაული უშუალო შემსრულებლები, ელისო ჯაფარიძე და ნოდარ წამალაშვილი მოწმის სახით გამოკითხული არიან მხოლოდ გუშინ და გუშინწინ, 16 და 17 აპრილს (!). სამინისტროს შენობაში განთავსებული სათვალთვალო კამერის ჩანაწერის ამოღებაზე მიმართვა გაკეთებულია შემთხვევიდან ოთხი თვის (!) გასვლის შემდეგ და პასუხი სამინისტროდან რა თქმა უნდა არის, რომ ჩანაწერები წაშლილია. ამ ჩანაწერებით დადასტურდებოდა, რომ არავითარი ლავრენტი ქირია სამინისტროში არ მისულა 8 ნოემბერს და ეს ე.წ. საჩივარი სამინისტროშივე შეადგინეს. არ არის გამოკითხული კანცელარიის თანამშრომელი, რომელიც ე.წ. საჩივრის მიღების დროს იყო მორიგე და რომელსაც უნდა ჩაებარებინა საჩივარი, ასეთის არსებობის შემთხვევაში. არ არის ამოღებული სავარაუდო დანაშაულში მონაწილე პირების მობილური ნომრების დეტალური ამონაწერი, რომლითაც დადასტურდებოდა, რომ დევნის ,,ოპერაცია'' წინასწარ იყო დაგეგმილი. არ არის გამოკითხულიც კი გამოძიების არც ერთ ეტაპზე ქ. ზუგდიდის რესურცენტრის ხელმძღვანელი, რომლის მიმართაც ქ. ზუგდიდის მე-7 საჯარო სკოლის ყოფილი დირექტორი და არაერთი მოწმე პირდაპირ ჩვენებებს იძლევა. არ არის გამოკითხული არც თვითონ მე-7 სკოლის ყოფილი ხელმძღვანელი“, - წერს შენგელია ფეისბუქის საკუთარ გვერდზე.

ია კერზაიას შვილი ამბობს, რომ საქმეში არსებობს სისტემური დანაშაულის ნიშნები. მისივე თქმით, საქმე გასცდა განათლების სამინისტროს ფარგლებს და მასში უკვე ჩართულია სამხარაულის ექსპერტიზა, ჯანდაცვის სამინისტრო და სხვა უწყებები. შენგელია პასუხისმგებლობას ქვეყნის პრემიერ-მინისტრსაც აკისრებს.

„დღეის შემდეგ არ მაქვს არანაირი იმედი და მოლოდინი, რომ საქართველოში, ამ ხელისუფლების პირობებში ია კერზაიას საქმე იქნება ობიექტურად გამოძიებული. ამიტომ, ვიწყებთ მუშაობას სტრასბურგის ადამიანის უფლებათა ევროპულ სასამართლოში მიმართვის პროცედურებს და აუცილებლად დავამტკიცებთ ჩვენს სიმართლეს უკვე საერთაშორისო დონეზე.მივმართავ საქართველოში აკრედიტებულ დიპლომატიურ კორპუსს სრულად, დაინტერესდნენ საქმის დეტალებით. ყველა არასამთავრობო ორგანიზაციას, სამოქალაქო სექტორის წარმომადგენლებს, საზოგადოების წევრებს. არ დავუშვათ კიდევ ერთი სისტემური დანაშაულის ჩადენა ჩვენს ქვეყანაში, დროულად მივაქციოთ სათანადო ყურადღება ამ საქმეს. მე კი, რა თქმა უნდა ვაგრძელებ ბრძოლას ყველა დამნაშავე პირის პასუხისგებაში მიცემამდე, იას სიმართლის დამტკიცებამდე და საბოლოო გამარჯვებამდე“, - წერს შენგელია.

ის დღეს პროკურატურაში იმყოფებოდა, სადაც საქმის მასალებს გაეცნო.