დიალოგში მონაწილეობენ რუსი ჟურნალისტები, ანალიტიკოსები და აკადემიური წრეების წარმომადგენლები. დიალოგის მონაწილეები ქართულ-ოსური კონფლიქტის ზონაში იმყოფებიან და ადგილზე ეცნობიან არსებულ ვითარებას. სტუმრები სოფელ ხურვალეთში ჩავიდნენ, რომელიც რუსმა მესაზღვრეებმა მავთულხლართებით გამიჯნეს და რამდენიმე მოსახლე ოსური მხარის კონტროლირებად ტერიტორიაზე მოექცა. დელეგაციის წევრებმა მას შემდეგ, რაც საკუთარი თვალით ნახეს შექმნილი მდგომარეობა, განაცხადეს, რომ საქართველოში ჩამოსვლამდე, აქ არსებულ ვითარებაზე გარკვეულ ინფორმაციებს ფლობდნენ, თუმცა აღნიშნეს, რომ რუსული მედია საშუალებებით კონფლიქტის ზომაში შექმნილი მდგომარეობა საკმაოდ მწირად შუქდება. "კავკასიური სახლი" უკვე ორი წელია პროექტს ახორციელებს და უკვე მეცხრე შეხვედრა გამართა. დიალოგის მონაწილეები შეხვედრებს მართავენ პოლიტოლოგებთან, ხელისუფლების წარმომადგენლებთან. "კავკასიური სახლის" პროექტის პარტნიორია მოსკოვის "კარნეგის ცენტრი". პროექტს ბრიტანეთის საგარეო საქმეთა სამინისტროს კონფლიქტების მოგვარების ფონდი აფინანსებს. დღესვე, დელეგაციის წევრები სოფელ დიცში გეგმავენ ჩასვლას და იქ არსებული ვითარების გაცნობას.