საქართველოში მეათე მოწვევის პარლამენტის არჩევნები მიმდინარეობს. ცენტრალური საარჩევნო კომისიის მონაცემებით, 2020 წლის 31 ოქტომბრის არჩევნებისთვის 3 526 023 ამომრჩეველია რეგისტრირებული. მათ შორის საზღვარგარეთ – 14 170, ხოლო საქართველოში 3 511 853 პირი.

ქვეყნის მასშტაბით, მოქალაქეებს ხმის მიცემა 3 657 საარჩევნო უბანზე შეუძლიათ. საზღვრებს გარეთ შექმნილია 52 საარჩევნო უბანი, მათ შორის ორი ავღანეთში. გამონაკლისის სახით, სასჯელაღსრულების დაწესებულებებში გახსნილია 11 სპეცუბანი, ხოლო კოვიდპანდემიის გათვალისწინებით, საკარანტინო სივრცეებში, თვითიზოლაციასა და სტაციონარში მყოფი პირებისთვის, რომლებიც ე.წ. სპეცსიებში არიან, 127 კოვიდუბანია გახსნილი.

2020 წლის 31 ოქტომბრის საპარლამენტო არჩევნებში ცენტრალური საარჩევნო კომისიის მიერ რეგისტრირებული 50 პოლიტიკური სუბიექტი მონაწილეობს. 30 მაჟორიტარულ ოლქში 50 პოლიტიკური სუბიექტისა და მოქალაქეთა საინიციატივო ჯგუფის მიერ, ჯამში 500 მაჟორიტარობის კანდიდატია რეგისტრირებული.

ცესკოს ცნობით, ზუგდიდის #27 მაჟორიტარულ ოლქში 109 საარჩევნო უბანი გაიხსნება. აქედან, 2 რუხისა და ანაკლიის კოვიდმიმღებ ცენტრებში მყოფ მოქალაქეებს მოემსახურება. აღნიშნულ ოლქში სულ 120 312 ამომრჩეველია რეგისტრირებული. მათგან 64 073 ქალია, ხოლო 56 239 მამაკაცი.

საპარლამენტო არჩევნები პირველად ახალი საარჩევნო სისტემით იმართება. ამომრჩეველი მეათე მოწვევის პარლამენტს ოთხი წლის ვადით, შერეული სისტემით აირჩევს 120 დეპუტატი პროპორციული საარჩევნო სისტემით აირჩევა, ხოლო 30 მაჟორიტარული სისტემით.

საპარლამენტო უმრავლესობისა და მთავრობის დამოუკიდებლად ფორმირებას ის პარტია ან საარჩევნო ბლოკი შეძლებს, რომელიც პროპორციული სისტემით ხმების 40 პროცენტზე მეტს მიიღებს.