„ლაზიკა კაპიტალის“ თანამშრომლებმა ზუგდიდელი მოზარდების, თორნიკე  და გოგა ნაჭყებიებისგან ჩიჩილაკები შეიძინეს. მიკროსაფინანსო ორგანიზაციის ბრენდის რეგიონული განვითარების მენეჯერი ლაშა ლოგუა ამბობს, რომ ისინი სოციალურ პასუხისმგებლობას იჩენენ და ორგანიზაცია მუდმივად ცდილობს მსგავს აქციებში ჩაერთოს.

"50 ცალი ჩიჩილაკი შევიძინეთ მოზარდებისგან და ამით მცირედი წვლილი შევიტანეთ ნაჭყებიების ოჯახის დამწვარი სახლის აღდგენაში. მოზარდებისთვის ეს ერთგვარი მოტივაციაა. მთავარი კი ამ ყველაფერში ის არის, რომ ეს ახალგაზრდები ცდილობენ, საქმე აკეთონ და გამოიმუშაონ საჭირო თანხა", - აღნიშნა ლოგუამ.
მისივე თქმით, თორნიკე და მისი უმცროსი ძმის საქმიანობის შესახებ რადიო „ათინათის“ მასალიდან გაიგეს.

16 წლის ზუგდიდელი თორნიკე ნაჭყებია, უმცროს ძმასთან ერთად, უკვე მეორე წელია ჩიჩილაკს გასაყიდად ამზადებს. ახალგაზრდები ამბობენ, რომ გამომუშავებული ფულით სურთ მშობლებს ახლად აშენებული სახლის მოწყობაში დაეხმარონ. ნაჭყებიებს სახლი გასული წლის დეკემბერში დაეწვათ.