მამუკა წოწერიას პირველ მოადგილედ კონსტანტინე კაკავა დაინიშნა. ის აქამდე მერის მოვალეობის შემსრულებელი იყო. აღნიშნულ თანამდებობას კაკავა მას შემდეგ იკავებდა, რაც პოსტი დატოვა ყოფილმა მერმა, გეგა შენგელიამ. როგორც ახლად დანიშნულმა ვიცემერმა რადიო "ათინათის" უთხრა, მამუკა წოწერიამ წინასაარჩევნო პერიოდში ზუგდიდისთვის მნიშვნელოვანი პრიორიტეტები საკუთარ პროგრამაში ასახა, რომელთა შესრულებასაც გეგმაზომიერად აპირებენ. 

"ჩვენთვის ამ პროგრამის განხორციელება და იმპლემენტაცია არის პრინციპულად მნიშვნელოვანი. თვისობრივად აბსოლუტურად განახლებულ ზუგდიდს მივიღებთ 4 წლის თავზე. პრიორიტეტებს რაც შეეხება, ეს არის უპირველესად ახალგაზრდები. მათთვის ისეთი სივრცეების შექმნა, სადაც შეეძლებათ შემეცნებითი, საგანმანათლებლო, ასევე ცხოვრების ჯანსაღი წესის მიმართულებით მნიშვნელოვანი საქმიანობის განხორციელება. ასეთი იქნება ზვიად გამსახურდიას სახელობის ბიბლიოთეკა და ახალგაზრდული ცენტრი. ასევე, სპორტული კომპლექსი საცურაო აუზით, სადაც სპორტის სხვადასხვა სახეობები, მათ შორის წყლის სპორტის სახეობები იქნება წარმოდგენილი. რა თქმა უნდა, უცვლელი პრიორიტეტია ინფრასტრუქტურის განახლება, ქალაქის ურბანული განვითარება, სატრანსპორტო კვანძების შექმნა, ახალი ხიდები. ჩვენი მოქალაქეები უნდა სარგებლობდნენ უსაფრთხო, კომფორტული და თანამედროვე გზებით, როგორც ქალაქის ტერიტორიაზე, ისე მუნიციპალიტეტის სასოფლო ტიპის დასახლებებში. ასევე ერთ-ერთი ყველაზე მნიშვნელოვანი მიმართულებაა წყლის სისტემების გამართვა და სუფთა წყლის მიწოდება სოფლად მცხოვრები მოსახლეობისთვის", - ამბობს კაკავა. 

გარდა ამისა, მერის ახლად დანიშნული მოადგილე მიიჩნევს, რომ ადგილობრივი ხელისუფლებისთვის მნიშვნელოვან გამოწვევად რჩება სოციალური და ჯანდაცვის მიმართულებები, რაზეც ასევე აპირებენ მუშაობას. 

"ზუგდიდის მუნიციპალიტეტი გამოირჩევა, შეიძლება ითქვას, სხვა მუნიციპალიტეტებისგან პროგრამების და ქვეპროგრამების როგორც რაოდენობით, ასევე ხარისხით და ჩვენ ვგეგმავთ ამ მიმართულებითაც სიახლეების დანერგვას. ეს იქნება უფრო მორგებული ჩვენი მოსახლეობის საჭიროებებზე და მნიშვნელოვანია, რომ ერთჯერადი დახმარებებიდან გადავიდეთ მდგრად და სერვისულ მომსახურებაზე. ეს უკვე ჩვენ დავიწყეთ და მომავალი წლიდან გაგრძელდება ამ მიმართულებით ცვლილებები, რეფორმები ადგილობრივ დონეზე. მოქალაქეებთან ერთად ჩვენ ამას ყველაფერს მივაღწევთ. მოსახლეობის აქტიური ჩართულობით, კონსულტაციებით, მივიღებთ უფრო განვითარებულ ზუგდიდს", - გვითხრა მან.

ადგილობრივი თვითმმართველობის არჩევნების შედეგად ზუგდიდის მერი მამუკა წოწერია გახდა. ის მოვალეობის შესრულებას 22 ნოემბრიდან შეუდგა.