ოკუპირებული აფხაზეთის დე ფაქტო საგარეო საქმეთა სამინისტროს განცხადებით, "რუსეთის პრეზიდენტის ვლადიმერ პუტინის აფხაზეთში ვიზიტი მესამე მხარის თანხმობას არ საჭიროებს". ამის შესახებ დე ფაქტო საგარეო საქმეთა სამინისტროს მიერ გავრცელებულ განცხადებაშია აღნიშნული, რომლითაც ის საქართველოს საგარეო საქმეთა სამინისტროს მიერ პუტინის ოკუპირებულ აფხაზეთში ვიზიტთან დაკავშირებით რუსეთის ფედერაციისათვის გაგზავნილ საპროტესტო ნოტას ეხმაურება. "2013 წლის 26 აგვისტოს საქართველოს საგარეო საქმეთა სამინისტრომ რუსეთის ფედერაციის პრეზიდენტის ვლადიმერ პუტინის აფხაზეთის რესპუბლიკაში ვიზიტთან დაკავშირებით საპროტესტო ნოტით მიმართა და აღნიშნული ვიზიტი "საქართველოს ტერიტორიული მთლიანობისა და სუვერენიტეტის ხელყოფის კიდევ ერთ ფაქტად" შეაფასა. აღნიშნულთან დაკავშირებით აფხაზეთის რესპუბლიკის საგარეო საქმეთა სამინისტრო აცხადებს: აფხაზმა ხალხმა საქართველოსთან სისხლისმღვრელ ომში გაიმარჯვა და სრულფასოვანი სახელმწიფოს მშენებლობაში წარმატებას მიაღწია. 2008 წლის 26 აგვისტოს რუსეთის ფედერაციამ აფხაზეთის რესპუბლიკის დამოუკიდებლობა აღიარა და მასთან ოფიციალური ურთიერთობები დაამყარა. ახალი სახელმწიფოს ან მთავრობის აღიარება სუვერენული სახელმწიფოს მთავარი პრეროგატივაა. ვერც საქართველო და ვერც ნებისმიერი სხვა ქვეყანა რუსეთის ფედერაციის მიერ მისი სუვერენული პრეროგატივის განხორციელებას ხელს ვერ შეუშლის, რომელიც საერთაშორისო დოკუმენტებითაა გამყარებული. ვლადიმერ პუტინის ან რუსეთის ფედერაციის სხვა ნებისმიერი ოფიციალური პირის ვიზიტი საერთაშორისო სამართლის თვალსაზრისით, აბსოლუტურად კანონიერია და მესამე მხარის თანხმობას არ საჭიროებს", - ნათქვამია დე ფაქტო საგარეო საქმეთა სამინისტროს განცხადებაში. შეგახსენებთ, რომ რუსეთის პრეზიდენტი ვლადიმერ პუტინი 25 აგვისტოს ოკუპირებულ აფხაზეთში იმყოფებოდა, რასაც ქართულმა მხარემ საპროტესტო ნოტით უპასუხა.