წალენჯიხის მუნიციპალიტეტს ცენტრალური ბიუჯეტის რეგიონში განსახორციელებელი პროექტების ფონდიდან დამატებით 2 650 000 ლარი გადაეცემა. ამის შესახებ სამეგრელო-ზემო სვანეთის სახელმწიფო რწმუნებულმა გიორგი გუგუჩიამ განაცხადა. სამხარეო ადმინისტრაციის ინფორმაციით, გუბერნატორი, მოადგილესთან და რეგიონული პროექტების სამსახურის უფროსთან ერთად წალენჯიხის მუნიციპალიტეტის მერს გიორგი ხარჩილავას და ამავე მუნიციპალიტეტის ინფრასტრუქტურის სამსახურის უფროსს შეხვდა. შეხვედრაზე მათგამოყოფილი თანხით დასაფინანსებელი პროექტები განიხილეს, რაც, ძირითადად, საგზაო ინფრასტრუქტურის მოწესრიგებისკენ იქნება მიმართული.

"რეგიონში განსახორციელებელი პროექტების ფონდიდან მუნიციპალიტეტებს დამატებით გამოეყოთ თანხები, პროექტების განსახორციელებლად. რა თქმა უნდა, გამონაკლის არც წალენჯიხა წარმოადგენს და ამ მუნიციპალიტეტისთვის გამოიყო რამდენიმე მილიონი. ერთობლივად განვიხილეთ, ყველა ის პროექტი, რომელიც მიჩნეული იქნა საბოლოო ჯამში პრიორიტეტულად წალენჯიხის მოსახლეობისთვის და რომლის დასაფინანსებლადაც ეს თანხა იქნება გამოყენებული" - განაცხადა გიორგი გუგუჩიამ.



ამავე ცნობით, შეხვედრაზე საუბარი ასევე შეეხო სტიქიის შედეგების სალიკვიდაციოდ გამოყოფილ თანხებს.

"გამოყოფილი თანხით ფინანსდება ექვსი პროექტი, საუბარია ოთხ ახალ და ორ გარდამავალ პროექტზე, რომელიც დაფინანსდება მიმდინარე წელს და ძალიან მნიშვნელოვნად წაწევს წინ საგზაო ინფრასტრუქტურას. ასევე განვიხილეთ სტიქიით მიყენებული ზარალის ანაზღაურების საკითხი, რომელიც ძალიან მნიშვნელოვანია, რადგან სტიქიამ მნიშვნელოვნად დააზარალა წალენჯიხის მუნიციპალიტეტი და აქაც ოპერატიული რეაგირება იყო მთავრობის მხრიდან და მოსახლეობა ამ სერვისებს ხარისხიანად და სწრაფად მიიღებს" - განაცხადა წალენჯიხის მერმა გიორგი ხარჩილავამ.

ივნისის ბოლოს მომხდარი სტიქიის შედეგების სალიკვიდაციოდ წალენჯიხის მუნიციპალიტეტი 1 მილიონამდე ლარს მიიღებს.