თხილის ხელშეწყობის პროგრამის ფარგლებში მთელი ქვეყნის მასშტაბით, მათ შორის, სამეგრელოში, მეთხილე-ფერმერების რეგისტრაცია მიმდინარეობს. საქართველოს თხილის მწარმოებელთა ასოციაციის დირექტორი გიორგი თოდუა ამბობს, რომ გასული კვირის განმავლობში, მას შემდეგ, რაც რეგისტრაცია დაიწყო, დაახლოებით, 4 ათასამდე ადგილობრივი დარეგისტრირდა.

"რეგისტრაციის შესახებ ფერმერებს ინფორმაციას აწვდიან სოფლის რწმუნებულები. შეხვედრები, ძირითადად, ადმინისტრაციულ ცენტრებში მიმდინარეობს, თუმცა, ხანდახან, შესაძლებელია, სხვა სივრცეც გამოიყოს. ადგილზე კონსულტაციებასაც ვუწევთ დარეგისტრირების მსურველებს. აქტივობა ნორმალურია, თუმცა, ყველას მოვუწოდებთ, რომ ჩაერთონ ამ პროგრამაში. სხვადასხვა პროგრამით ჩვენ თხილის წარმოება შევინარჩუნეთ და ახლა დროა, ისევ და ისევ წინ გადავდგათ ნაბიჯები", - აღნიშნა თოდუამ.

ამ დროისთვის რეგისტრაცია უკვე ჩატარდა ზუგდიდის სოფლებში - ნაცატუსა და კორცხელში, ასევე, სხვა მუნიციპალიტეტების სოფლების ნაწილში. დღეიდან კი პროგრამაში ჩასართავად დარეგისტრირება შეუძლიათ ბაშისა და ჩხოუშის, ამასთან, სამეგრელოს სხვა მუნიციპალიტეტების მაცხოვრებლებს.

თხილის წარმოების ხელშეწყობის პროგრამის განხორციელება მიმდინარე წლის 7 ნოემბრიდან დაიწყო. აღნიშნულ პროექტზე პრემერ-მინისტრმა ირაკლი ღარიბაშვილმა ისაუბრა.

პროგრამის ფარგლებში სუბსიდიის მისაღებად, საქართველოს მოქალაქე, ფიზიკურ პირს საკუთრებაში ან/და ფაქტობრივ მფლობელობაში უნდა გააჩნდეს თხილის ბაღი ჯამურად არანაკლებ 0.2 და არაუმეტეს 3 ჰექტრისა. სუბსიდიის მოცულობა განისაზღვრება 500 ლარით 1 ჰა თხილის ბაღზე გადაანგარიშებით. 

პროგრამაში ჩართულ ბენეფიციარებზე სუბსიდია ლიბერთი ბანკის აგრობარათზე შესაბამისი ქულების დარიცხვით მოხდება. ქულების დარიცხვა კი 2023 წლის გაზაფხულზე დაიწყება.

სპეციალიზებულ აგრომაღაზიებში დარიცხული ქულების გამოყენების ბოლო ვადაა 2023 წლის 31 აგვისტო.


ფოტო: თხილის მწარმოებელთა ასოციაცია