წუხელ გვიან ღამით აბაშაში სოფელ მარანში დოლიძეების ოჯახს ქარმა სახურავი გადახადა, იყო სახლის დანგრევის საფრთხეც. ამის შესახებ ჟურნალისტებთან სამეგრელო-ზემო სვანეთის სახელმწიფო რწმუნებულმა გიორგი გუგუჩიამ ისაუბრა. მისივე თქმით, აბაშის მერთან ერთად მიიღეს გადაწყვეტილება და ოჯახი სასტუმროში გადაიყვანეს.

გუბერნატორმა მადლობა გადაუხადა გაწეული სამსახურისთვის მუნიციპალურ სამსახურებს. როგორც მან აღნიშნა, წუხანდელი ღამე იყო მძიმე და ძლიერმა ქარმა დააზიანა სხვადასხვა ინფრასტრუქტურა და კერძო საკუთრება.

"პირველ რიგში მინდა დავიწყო მადლობით და მადლობა გადავუხადო უამრავ ადამიანს, რომელიც ამ ურთულეს მეტეოროლოგიურ პირობებში, ხშირად საკუთარი ჯანმრთელობის რისკის ფასად მუშაობს, იმისთვის რომ სხვების უსაფრთხოება იყოს დაცული, ვგულისხმობ მუნიციპალურ სამსახურებს, "ენერგო-პროს", "სოკარის" ავარიულ ჯგუფებს, სამაშველო სამსახურს. რაც შეეხება გასულ ღამეს, ის არ იყოს ჩვენთვის მარტივი, უკვე გვაქვს პირველადი მონაცემები, რა რაოდენობის ზარალი მოგვაყენა ამ სტიქიამ. სტიქიურმა მოვლენებმა მუნიციპალიტეტებში გამოიწვია სხვადასხვა ინფრასტრუქტურისა და საკუთრების დაზიანება. დაზიანდა 966 კერძო საცხოვრებელი სახლის და 38 საცხოვრებელი კორპუსის, 2 ამბულატორიის შენობის, 5 საბავშვო ბაღის, 5 საჯარო სკოლის, 3 საჯარო სკოლის დარბაზის, 10 ადმინისტრაციული შენობის სახურავი. ელექტროენერგია არ მიეწოდება 114 ადმინისტრაციულ ერთეულს. "ენერგო-პროს" ჯგუფების მიერ მიმდინარეობს 24 საათიან რეჟიმში მუშაობა'', - თქვა გიორგი გუგუჩიამ.

გუბერნატორმა ყველას მოუწოდა გადაუდებელი აუცილებლობის გარდა არ გავიდნენ სახლიდან და თუ დასჭირდებათ დარეკონ მუნიციპალიტეტებში ამოქმედებულ ცხელ ხაზებზე.