სამეგრელოში კლიმატური პირობების გაუარესების შედეგად ადიდებულმა მდინარე ტეხურამ გაერთიანებული წყალმომარაგების ინფრასტრუქტურა დააზიანა. ინფორმაციას საქართველოს გაერთიანებული წყალომარაგების კომპანია ავრცელებს.

მათივე განცხადებით, სტიქიის შედეგად წყალმომარაგება შეეზღუდა სენაკისა და ფოთის 32 000-ზე მეტ აბონენტს.

,,დაზიანებულია სენაკის მკვებავი ორი 300 მმ-იანი და ქ. ფოთის მკვებავი 700 მმ-იანი ცენტრალური მილები. ადიდებული მდინარე ტეხურას ფონზე, კომპანიის ტექნიკური სამსახური დაზიანების ადგილამდე მისვლას ჯერ-ჯერობით ვერ ახერხებს. მიუხედავად ამისა, გაერთიანებული წყალმომარაგების კომპანიის სამეგრელოს სერვის ცენტრის თანამშრომლები აქტიურად მუშაობენ, რათა მოსახლეობას წყალმომარაგება უმოკლედ დროში აღუდგეს, შეგახსენებთ, 24 საათიან რეჟიმში მუშაობს კომპანიის ცხელი ხაზი: 032 2 93 00 00 გაერთიანებული წყალმომარაგების კომპანია ბოდიშს გიხდით შექნილი დისკომფორტის გამო'', - ვკითხულობთ გავცელებულ ინფორმაციაში.

კომპანიის ცნობით, ამ ეტაპზე, რთული რელიეფისა და წყალუხვობის გამო, დაზიანების ლიკვიდაცია შეუძლებელია. მძიმე მეტეოროლოგიური პირობების გათვალისწინებით, დაზიანებული ინფრასტრუქტურის აღდგენითი სამუშაოები ვერ ხერხდება.