2003 წლის ნოემბრის მოვლენებიდან, რომელიც საქართველოს ისტორიაში “ვარდების რევოლუციის” სახელით შევიდა, 20 წელი გავიდა.

2003 წლის 2 ნოემბრის არჩევნების გაყალბების შემდეგ ოპოზიციურმა პარტიებმა და ბლოკებმა ხალხთან ერთად მრავალათასიანი გამოსვლები დაიწყეს თბილისსა და რეგიონებში, მათ შორის, საპროტესტო აქციები იყო ზუგდიდში, სადაც 7 ნოემბერს ჩასულ მიხეილ სააკაშვილსა და “ერთიანი ნაციონალური მოძრაობის” წევრების, აქციის მონაწილეების მიმართ იყო სროლაც.

მოგვიანებით კი, რეგიონებიდან დედაქალაქისკენ დაძრულ ავტოკოლონას წალენჯიხიდან მიმავალი ავტობუსი მიუძღოდა, სადაც სააკაშვილი იჯდა.

2003 წლის 22 ნოემბერს, მეხუთე მოწვევის პარლამენტის სხდომის გახსნაზე, რომელზეც სიტყვით პრეზიდენტი ედუარდ შევარდნაძე გამოდიოდა, ჯარისა და პოლიციის კორდინების გარღვევის შემდეგ ხალხთან ერთად შევიდა ოპოზიციონერი ლიდერი, ენმ-ს ხელმძღვანელი სააკაშვილი. სხდომათა დარბაზში ისინი სკანდირებდნენ: “გადადექი”.

2003 წლის 23 ნოემბერს გადადგა ედუარდ შევარდნაძე, პრეზიდენტის მოვალეობის შესრულებას შეუდგა ნინო ბურჯანაძე და არჩევნების გაუქმების შემდეგ დაინიშნა ხელახალი საპარლამენტო არჩევნები.

2004 წლის იანვრის არჩევნების შედეგად ხელისუფლების სათავეში მოვიდა “ერთიანი ნაციონალური მოძრაობა”, პრეზიდენტი გახდა მიხეილ სააკაშვილი.