24 ოქტომბერს, ზუგდიდში, სასტუმრო "ლეთოში" გულის გაჩერების დროს პირველადი დახმარების შესახებ საინფორმაციო კამპანიის "წუთები წყვეტს... დაუბრუნე სიცოცხლე გულს" ფარგლებში, შეხვედრა გაიმართა, რომელსაც საქართველოს გულის რიტმის ასოციაციის თავმჯდომარე კახაბერ ეცადაშვილი, არჩეული თავმჯდომარე ხათუნა ჯალაბაძე, გარეგანი დეფიბრილატორების მწარმოებელი კომპანია ძოლლ-ის წარმომადგენელი გიორგი ლიპარტელიანი და კამპანიის მხარდამჭერი, საქართველოს რაგბის ეროვნული ნაკრებისა და კლუბ "შავი ლომი"-ს კაპიტანი მერაბ შარიქაძე დაესწრნენ. ასოციაციის განმარტებით, კამპანიის მიზანს, დამსწრე საზოგადოებისთვის გულის გაჩერების დროს პირველადი დახმარებისა და გარეგანი ავტომატური დეფიბრილატორის საჭიროების შესახებ ინფორმაციის მიწოდება და კამპანიის მხარდაჭერა წარმოადგენს.

ადგილზე სამედიცინო აპარატის დემონსტრირების შემდეგ დამსწრეები მისი გამოყენების წესებს გაეცნენ.

დასასრულს კი, საქართველოს გულის რიტმის ასოციაციის (GeHRA) წარმომადგენლებმა ადგილობრივი რაგბის კლუბის "სოხუმის" დამფუძნებელს ლევან ჯობავას უსასყიდლოდ გადასცეს გარეგანი ავტომატური დეფიბრილატორი.

"კლუბი "სოხუმი" არსებობს მხოლოდ კერძო შემოწირულობებით. შესაბამისად, როდესაც დეფიბრილატორების უსასყიდლოდ გადაცემის კანდიდატებს ვარჩევდით, სწორედ ამ კრიტერიუმებით ვიხელმძღვანელეთ. ჩვენი მიზანია, რომ ყველა სპორტული კლუბი მომავალში აღჭურვილი იყოს ავტომატური დეფიბრილატორებით. ეს იქნება პირველი ნაბიჯი, რომ სხვა კლუბებმაც და ორგანიზაციებმა აიტაცონ აღნიშნული ინიციატივა," - განმარტა კახაბერ ეცადაშვილმა.

რითმოლოგ ხათუნა ჯალაბაძის თქმით, საზოგადოებამ უნდა იცოდეს, თუ როგორ უნდა დაეხმაროს ადამიანს გულის გაჩერების შემთხვევაში და ამისათვის, მნიშვნელოვანია აღნიშნული საინფორმაციო კამპანია.

"მთავარია ის, რომ ასე თუ ისე, საზოგადოებამ იცის გულის არაპირდაპირი მასაჟის შესახებ. რაღაც ინფორმაცია არის, თუმცა ცნობილი არ არის ავტომატური დეფიბრილატორების შესახებ, რაც ძალიან მნიშვნელოვანია გაჩნდეს ჩვენს საზოგადოებაში, საჯარო სივრცეებში. ფაქტობრივად, ჩვენ ყველა ვინც ვართ დედა,მამა, ბებია, ძმა, და ყველამ უნდა ვიცოდეთ, პირველი რაც უნდა მოვითხოვოთ, შვილი მიგვყავს სპორტულ დარბაზში უნდა ვკითხოთ მათ თუ აქვთ ავტომატური დეფიბრილატორი. როდესაც მივდივართ სპორტულ მოედანზე, ჩვენ უნდა ვიცოდეთ, რომ იქ არსებობს ავტომატური დეფიბრილატორი, რადგან კარდიოპულმონური რეანიმაცია მასაჟთან ერთად, გულისხმობს ავტომატური დეფიბრილატორის გამოყენებას რათა დავიცვათ ძალიან ბევრი სიცოცხლე. ჩვენი კამპანია ემსახურება გაიზარდოს ინფორმირებულობა ადამიანების, იმის შესახებ, რომ მოვითხოვოთ საჯარო სივრცეებში ავტომატური დეფიბრილატორების დამონტაჟება", - თქვა ჯალაბაძემ.

რაგბის კლუბ "სოხუმის" დამფუძნებელი ლევან ჯობავა მიიჩნევს, რომ მსგავსი ტრენინგები ძალიან მნიშვნელოვანია, რადგან ეს ხელს შეუწყობს ექსტრემალურ სიტუაციებში საზოგადოების მზაობას, გაუწიონ პირველადი დახმარება და გადაარჩინონ ადამიანის სიცოცხლე.

"გადმოცემული საჩუქარი კლუბისთვის ძალიან მნიშვნელოვანია. ღმერთმა არ დაგვაჭირვოს, მაგრამ საჭიროების შემთხვევაში ჩვენ ვიქნებით მზად და ვიქნებით უფრო ძლიერები იმისთვის რომ გადავარჩინოთ ადამიანის სიცოცხლე. მადლობა ორგანიზატორებს, იმისთვის რომ, ჩვენს ბავშვებს მიეცათ შანსი აემაღლებინათ ცნობიერება ამ მიმართულებით და ასეთი საჩუქრისთვის", - ამბობს ჯობავა.

ინფორმაციისთვის, სამედიცინო აპარატი - დეფიბრილატორი ელექტრული იმპულსით ზემოქმედების საშუალებით უზრუნველყოფს გულის კუნთის ამუშავებას. მისი გამოყენება მარტივია და შესაბამისი ინფორმაციის ფლობის შემდეგ ნებისმიერი ადამიანი შეძლებს მის გამოყენებას საჭიროების შემთხვევაში. კვლევები აჩვენებს, რომ გულის გაჩერების დროს, დეფიბრილატორის გამოყენება ასოცირდება, საშუალოდ, გადარჩენის 40%-თან, საჭირო დახმარების აღმოჩენის გარეშე სიკვდილიანობა 95%-ია. ამრიგად, გამოკვეთილია დეფიბრილატორის განთავსების საჭიროება საჯარო სივრცეებში.