შინაგან საქმეთა სამინისტროს თანამშრომლებმა თბილისსა და რეგიონებში, მათ შორის, სამეგრელო-ზემო სვანეთში, ნარკოდანაშაულის ბრალდებით 112 პირი დააკავეს, მათ შორის 66 ნარკორეალიზატორია.

ინფორმაციას ამის შესახებ შსს ავრცელებს.

უწყების ცნობით, დაკავებულებს შორის არიან როგორც საქართველოს, ასევე, ამერიკის შეერთებული შტატების, თურქეთის, უკრაინის, ინდოეთის, ირანის, რუსეთის, იორდანიის, ეგვიპტის და ერიტრეას მოქალაქეები.

"მთელი ქვეყნის მასშტაბით ჩატარებული ოპერატიული ღონისძიებებისა და საგამოძიებო მოქმედებების შედეგად, ბრალდებულების მიერ მითითებული ლოკაციებიდან, ასევე, დაკავებულების პირადი, ავტომანქანის და საცხოვრებელი სახლების ჩხრეკისას, ნივთმტკიცების სახით ამოღებულია დიდი და განსაკუთრებით დიდი ოდენობით ნარკოტიკული და ფსიქოტროპული საშუალებები: "ჰეროინი", "კოკაინი" "ალფა პვპ", "სუბოტექსი" "სუბოქსინი", "მეტადონი", "მდმა", "კეტამინი", "ლიზერგიდი" (LშD), "მეტამფეტამინი", "ბუპრენორფინი", "მეფედრონი", "ამფეტამინი", "დიმეთილტრიფტამინი", "პრეგაბალინი", "ტრამადოლის", ,,ტეტრაჰიდროკანაბინოლის" და "ფსილოცინის" შემცველი ნივთიერებები, ასევე, "მარიხუანა" და ნარკოტიკული საშუალების შემცველი მცენარე "კანაფი".

ბრალდებულებისგან პოლიციამ, ასევე, ნივთმტკიცებად ამოიღო ცეცხლსასროლი იარაღი, სამი პისტოლეტი, ორი სანადირო თოფი, ვაზნები, კომპიუტერული ტექნიკა, მობილური ტელეფონები, ელექტრო სასწორები და სავარაუდოდ, ნარკოტიკების რეალიზაციის შედეგად მიღებული თანხა.

გამოძიება საქართველოს სისხლის სამართლის კოდექსის 260-ე, 18-260-ე, 19-260-ე, 261-ე, 262-ე, 263-ე, 265-ე, 273-ე პრიმა, 18-273 პრიმა, 19-273 პრიმა და 236-ე მუხლებით მიმდინარეობს", - ვკითხულობთ შს სამინისტროს განცხაებაში.

ამასთან, უწყებაში ამბობენ, რომ მიმდინარე წლის 1-ლი იანვრიდან დღემდე, მთელი ქვეყნის მასშტაბით, 282 ნარკორეალიზატორია დაკავებული.

პოლიციამ ჯამში მთელი წლის განმავლობაში უკანონო ბრუნვიდან ამოიღო 84 კილოგრამი "ჰეროინი", 20 კილოგრამი "ალფა პვპ", 9 500 აბი "სუბოტექსი" და "სუბოქსინი", 2,5 კილოგრამი "კოკაინი", 4 კილოგრამი "მეფედრონი", 2.5 კილოგრამი "მდმა", ასევე, 304 კილოგრამი მარიხუანა, 4 ტონამდე "კანაფი", 13 კილოგრამი სხვადასხვა სახის ფსიქოტროპული მედიკამენტები და 3 კილოგრამი ახალი ფსიქოაქტიური ნივთიერება.