აფხაზეთის თვითაღიარებული რესპუბლიკის შინაგან საქმეთა სამინისტროსა და რუსეთის ფედერაციის ეროვნულ გვარდიას შორის თანამშრომლობის ხელშეკრულება „არ ექვემდებარება ხელმოწერას“, ამის შესახებ ე.წ. შსს-ს ხელმღვანელმა რობერტ კიუტმა განაცხადა, წერს „აფსნიპრესი“.

„სრული პასუხისმგებლობით ვაცხადებ, რომ ჩვენს უწყებაში, ისევე, როგორც ქვეყნის მთელ ხელმძღვანელობაში, არ არიან ადამიანები, რომლებიც იმოქმედებენ და პროფესიული საქმიანობას შეასრულებენ აფხაზეთის სახელმწიფოს ეროვნული ინტერესებისა ან ჩვენი მოქალაქეების ინტერესების საზიანოდ“, - განაცხადა მან.

კიუტის მტკიცებით, „აფხაზეთი არის სუვერენული, დამოუკიდებელი სახელმწიფო“ და ამ სტატუსს იცავენ 30 წელია.

„აფხაზეთის რესპუბლიკის მოქმედი კონსტიტუცია და კანონმდებლობა არ იძლევა საშუალებას, რომ ქვეყანაში საზოგადოებრივი უსაფრთხოება და წესრიგი დაიცვას უცხო სახელმწიფოს ძალოვანმა სტრუქტურებმა“, - თქვა კიუტმა.

მისივე განმარტებით, წინასწარი შეთანხმებების შესაბამისად, გადაწყდა მომზადდეს ხელშეკრულების პროექტი „აფხაზეთის შინაგან საქმეთა სამინისტროსა და ეროვნულ გვარდიას შორის ურთიერთქმედების შესახებ“, თუმცა ის „არანაირად არ ითვალისწინებს რუსეთის გვარდიის თანამშრომლების ფიზიკურ ყოფნას აფხაზეთის ტერიტორიაზე ან მათ ჩარევას ჩვენს შიდა პოლიტიკურ საქმიანობაში“.

მან დასძინა, რომ ხელშეკრულების შეთანხმების და ხელმოწერის შემთხვევაში, საუბარია გამოცდილების გაცვლასა და ცოდნის მიღებაზე, შესაბამის უნივერსიტეტებში.

რამდენიმე დღის წინ, აფხაზურ მედიაში გავრცელდა ინფორმაცია, რომ თვითგამოცხადებული რესპუბლიკის შინაგან საქმეთა სამინისტრომ, შესაძლოა, შეთანხმება დადოს რუსეთის ეროვნული გვარდიის ჯარის ფედერალურ სამსახურთან („როსგვარდია“).