სასამართლოს გადაწყვეტილებით, ბალდის კანიონის ინვესტორის "კანიონ 350"-ის წინააღმდეგ ზედამხედველობის სამსახურის მიერ გამოწერილი ჯარიმები გაუქმებულია.

კომპანიის ხელმძღვანელი გიორგი მერკვილაძე რადიო "ათინათს" იმ კონკრეტული ჯარიმების შესახებ უყვება, რომელიც სასამართლომ აბსურდულად ცნო.

"სამუშაო ადგილზე მასალების ჩამოტვირთვისას სამი თუ ოთხი ჯარიმა გამოწერეს, რადგან ეს მასალა გზაზე ჩამოვტვირთე, რომელიც რეალურად არავის ემსახურება.

კიდევ ერთი ჯარიმა ეხებოდა ღობეს. თავდაპირველად, რაც იჯარით გვქონდა აღებული ამას სცდებოდა 50 სანტიმეტრით, ზოგან მეტრით, ზოგან 3 მეტრით და ჩვენ ამაზე დავწერეთ განცხადება საგზაო დეპარტამენტში, მათ ეს ხელშეკრულება გაგვიფორმეს და მოგვცეს. თუმცა, ისინი მოვიდნენ და მაინც დააჯარიმებინეს იქამდე, სანამ ეს ხელშეკრულება გაფორმდებოდა", - თქვა მერკვილაძემ.

მისივე თქმით, ერთი ჯარიმა იმ ბილიკის მოწყობას უკავშირდებოდა, რომელიც სამუშაო ტერიტორიას კვეთდა და ყოველდღიურად უწევდა მასზე გადაადგილება.

"იქ გზა რომ გაკეთდა, გზიდან მთელი მასალა ჩაყრილი იყო ხეობაში და კანიონში, ჩვენი მუშაობის შემდეგ ამ ჩაყრილმა მასალამ დაიწყო დაძვრა და ჩავატარეთ მისი გამაგრებითი სამუშაოები. ეს მასა რომ მოვაშორეთ, ავაშენეთ კედელი და უკან მივაყარეთ მიწა, ამაზე გამოაწერინეს. ეს მიყრილი მიწა, თურმე ყოფილა უკანონოდ მოპოვებული წიაღისეული.

მოსამართლემ ამ ყველაფერზე იმსჯელა და ყველა ჯარიმა მოხსნა. სახელმწიფომ თუ გასცა სამშენებლო ნებართვა, მე უნდა მქონდეს იქ მასალის მიტანის უფლება, აბსურდული იყო ჯარიმები.

მოსამართლემ მითხრა, ისე ჩავატარო სამუშაოები, რომ აღარ მოვიდნენ ეს ხალხი", - თქვა მერკვილაძემ.

რესპონდენტის თქმით, იგეგმება კვლევა, რომელმაც უნდა შეამოწმოს სოფლის ბუნებასა და გარემოზე კომპანიის სამუშაოების ზეგავლენა და შედეგების მიხედვით გაგრძელდება საქმიანობა.

პროტესტის ერთ-ერთი მონაწილე ცოტნე თვარაძე ამბობს, რომ ჯარიმების შესახებ სამინისტროსგან გამოთხოვილი ინფორმაცია ჯერ არ მიუღიათ და სავარაუდოდ, საქმე ეხება ექვსზე მეტ ჯარიმას.

"მე ვერ გეტყვით, რომ ჯარიმები გაბათილებულია და თუ გაბათილებულია, რომელ ჯარიმებს ეხება ეს. თვეში, დაახლოებით 7-8 ჯარიმა იყო.

ზოგადად, ისეთ განწყობას ქმნიან, თითქოს კანონი არსად არ დაურღვევიათ, რეალურად კი ძალიან ბევრი კანონი დაარღვიეს და შესაბამისად, ბევრი ჯარიმა აქვთ გამოწერილი.

ეს 6 ჯარიმა მარტო ერთი თვის იყო. სექტემბერში თუ ოქტომბერში 6 ჯარიმა გამოუწერეს ამ კომპანიას".

სამომავლო გეგმებთან დაკავშირებით, თვარაძე განმარტავს, რომ პროტესტის მონაწილეები ელოდებიან კომპანიისა და მოსახლეობის შეხვედრის შედეგებს, რომელიც, მისივე თქმით, ორი კვირის ვადაში იგეგმება.

მარტვილის მუნიციპალიტეტის სოფელ ბალდაში, ბალდის კანიონი, რომელიც ბუნების ძეგლია, აუქციონის წესით, 20 - წლიანი საკუთრების უფლებითა და გარკვეული ვალდებულებებით კომპანია "კანიონ 350"-ს გადაეცა.

კვირებია, ბალდელების ნაწილი სამუშაოების შეჩერებას ითხოვს და კანიონის გასხვისებას უკანონოს უწოდებს.

სახელმწიფო უწყებაში განმარტავენ, რომ ყველა სახის სამუშაო კანონის სრული დაცვით მიმდინარეობს. კომპანიამ ორი წლის განმავლობაში 3 მილიონ ლარამდე ინვესტიცია უნდა განახორციელოს, მომდევნო 3 წლის ვადაში კი ბუნების ძეგლზე მოაწყოს ეკოტურისტული ინფრასტრუქტურა - ვიზიტორთა ცენტრი, როლერი ატრაქცია, კიდული ბილიკი და საფეხმავლო ბილიკი.

კანიონის ინფორმაციით, ინფრასტრუქტურული სამუშაოები 2023 წლის აპრილის თვიდან დაიწყო. პროექტის დაწყებამდე კი შეისწავლეს ბუნების ძეგლის გეოლოგიური,ჰიდროლოგიური კომპონენტი, რათა ბუნების ძეგლზე ინფრასტრუქტურის მოწყობა უსაფრთხო ყოფილიყო.




ამავე თემაზე:

ბალდის კანიონის შესანარჩუნებლად ადგილობრივთა პროტესტი გრძელდება