მიმდინარე მოვლენებთან და საპროტესტო აქციებთან დაკავშირებით, 30 აპრილს, სოციალურ ქსელში, ადამიანების დასაკავშირებლად,  ჯგუფი „დაიტოვე“ შეიქმნა.

ის ეხმარება მათ, „ვისაც აქციაზე უნდა ყოფნა, თუმცა ცხოვრობენ რეგიონებში და ვერ ახერხებენ იმავე დღეს, გვიან, შინ დაბრუნებას და მათ, ვინც ცხოვრობს თბილისში და აქვს შესაძლებლობა თანამოაზრეები დაიტოვონ შინ, აქციის დასრულების შემდეგ“, - ვკითხულობთ პოსტში, რომელიც ფეისბუკში გავრცელდა.

ჯგუფის შექმნის იდეა, მარიამ ბაბუნაშვილს ეკუთვნის. ამ დროისათვის, მასში 58 ათასამდე ადამიანია გაწევრიანებული.

ბათუმიდან თბილისისკენ წამსვლელებს გავატანთ გემრიელ საგზალს - ღვეზელებს, ხაჭაპურებს და მისთანებს.
თქვენზე საპატიოს ვის უნდა ერგოს?!
თქვენ გვერდით გვიგულეთ რიგითი ბათუმელები!!!

ანგარიშის ნომერი დადეთ რომ დავაფინანსო მგზავრობა ❤️❤️❤️

ჩვენს თვალწინ არნახული საქართველო იბადება❤

სალამი თანამებრძოლებს! 30-ში დაბადების დღე მქონდა, თუმცა ახლა პირადი ბედნიერების და გართობის დრო ნამდვილად არ არის. ჰოდა ამ დღისთვის ნაყიდი საკვებით მინდა მაქსიმალურად დაგეხმაროთ და მითხარით სად და როგორ?
ამ ბრძოლას აუცილებლად მოვიგებთ და ვერ შეგვაშინებენ


მასობრივი პროტესტები თბილისსა და სხვა ქალაქებში მას შემდეგ დაიწყო, რაც საქართველოს პარლამენტის უმრავლესობამ კანონპროექტი „უცხოური გავლენის გამჭვირვალობის შესახებ" პირველი მოსმენით 17 აპრილს მიიღო.

კანონპროექტის გაწვევის მოთხოვნით მრავალათასიანი საპროტესტო გამოსვლების მიუხედავად, 30 აპრილს პლენარულ სხდომაზე დაიწყო პროექტის მეორე მოსმენით განხილვა, რასაც მორიგი საპროტესტო გამოსვლა მოჰყვა. მანიფესტანტები, რომელთა ძირითადი ნაწილი ახალგაზრდობაა, „აგენტების“ კანონს თბილისის სხვადასხვა წერტილში აპროტესტებენ.

წუხანდელი აქციის დასაშლელად, ხელისუფლებამ სპეცდანიშნულების რაზმები ისევ გამოიყვანა, მრავალგზის გამოიყენა ცრემლსადენი გაზი, წყლის ჭავლი და ფიზიკურად უსწორდებოდა და აკავებდა აქციის მონაწილეებს.

შსს- ს ინფორმაციით, თბილისში, აქციაზე, 63 ადამიანი დააკავეს.

მთავარი ფოტო - ირაკლი გამსახურდია