„უცხო აგენტების“ შესახებ კანონის წინააღმდეგ თბილისსა და საქართველოს სხვა ქალაქებში მიმდინარე პროტესტს სოხუმში ისევ ეხმიანებიან.
ქართულ-აფხაზური ომის კიდევ ერთი ვეტერანმა და პარლამენტის ყოფილმა წევრმა სოციალურ ქსელში დაწერა, რომ არცერთი თავისუფალი საზოგადოება არ დაუშვებს „აგენტების შესახებ კანონის მიღებას იმ ვერსიით, რომელსაც ახლა სთავაზობენ ქართულ და აფხაზურ საზოგადოებებს“.

„კანონპროექტი ამ სახით ხელისუფლებას აძლევს შესაძლებლობას „სასამართლო გადაწყვეტილების გარეშე, საკუთარი ინტერპრეტირების საფუძველზე განსაზღვროს ორგანიზაციებისა და საზოგადოებრივი აქტივისტების საქმიანობა, როგორც არასასურველის; კანონპროექტი ზღუდავს მოქალაქეთა კონსტიტუციურ უფლებებსა, მათ შორის შრომის, ნების გამოხატვისა და საჯარო ქმედების თავისუფლებას; აშკარა ავტორიტარული და იზოლაციონისტური ორიენტაციის გამო, მნიშვნელოვნად ავიწროებს ამ კანონის მიმღები სახელმწიფოს საგარეო პოლიტიკური ურთიერთქმედების დიაპაზონს“, - წერს ბჟანია.

ის მიიჩნევს, რომ საქართველოს პარლამენტის მიერ „აგენტების“ შესახებ კანონის მიღებამ, შესაძლოა, ხელი შეუწყოს სამხრეთ კავკასიაში ახალი რეალობის ჩამოყალიბებას.

„რუსეთის ფედერაციასა და საქართველოს შორის ეკონომიკური და რეგიონული პარტნიორობა უკანა პლანზე გადაწევს ჩვენი მეზობლების ევროპული ინტეგრაციის იდეას. და მერე... ვინ იცის, რა კომპრომისების მიღწევა იქნება შესაძლებელი და რა გახდება ამ კომპრომისების საგანი. აფხაზეთი? ეს არ არის გამორიცხული“, - ამბობს ის.

მისივე თქმით, ქართული მხარე "ამას დაჟინებით მოითხოვს" და ზოგიერთი რუსი ექსპერტი "არ მალავს მსგავსი სცენარის ალბათობას და გამართლებას".

„თქვენი თავისუფალი არჩევანის მიღება მხოლოდ მათ შეუძლიათ, ვინც თავად აფასებს საკუთარ თავისუფალ არჩევანს! და ამ კონტექსტში, “ქართული ოცნება”, თავისი ოცნებით, რომ შეზღუდოს საკუთარი მოქალაქეების უფლებები და თავისუფლებები, შეიძლება არ იყოს ყველაზე პერსპექტიული მომლაპარაკებელი, როცა (და თუ) საქმე ეხება აფხაზეთის მოქალაქეების თავისუფალ არჩევანს. და აფხაზებმა არაერთხელ დაადასტურეს, რომ აფასებენ თავისუფლებას“, - აღნიშნა მან.

ახრა ბჟანიამ პოსტში აფხაზეთის დე ფაქტო რესპუბლიკის „ამჟამინდელი ხელისუფლების სუიციდური ინიციატივისადმი წინააღმდეგობის გაწევაზე“ მიუთითა:

„სოხუმში ორწლიანმა პროტესტმა ფაქტობრივად აპარტამენტების, უცხო აგენტების, დასმენის და სხვა ოდიოზური კანონების პარალიზება მოახდინა. ახლა ბურთი ენგურს გაღმაა... შეძლებს თუ არა ქართული საზოგადოება დაიცვას თავისი სამოქალაქო თავისუფლებები და წაადგება თუ არა ის მომავალში, თუნდაც ძალიან მერყევი ფუნდამენტით, ქართულ - აფხაზური ურთიერთობების დარეგულირებას? ვნახოთ!“, - დასძინა მან.

მანამდე, აფხაზმა ომის ვეტერანმა ლაშა ზუხბამ გამოაქვეყნა პოსტი, რომელშიც მან სოლიდარობა გამოუცხადა თბილისში აქციის მონაწილეებს. სოციალური ქსელის აფხაზური სეგმენტის მომხმარებლების ნაწილმა ის გააკრიტიკა, ზოგიერთებმა კი მის პოზიციას დაუჭირა მხარი, „აგენტების“ კანონთან დაკავშირებით.

საქართველოს პარლამენტმა, 83 ხმით, "უცხოური გავლენის გამჭვირვალობის შესახებ" კანონპროექტი პირველი მოსმენით 17 აპრილს, ხოლო მეორე მოსმენით, 1 მაისს მიიღო. პროტესტები სამ კვირაზე მეტია უწყვეტად მიმდინარეობს თბილისსა და საქართველოს სხვა ქალაქებში, მათ შორის ზუგდიდში.