დღეს ზუგდიდის თეატრში არასამთავრობო ორგანიზაციების წარმომადგენლები, მოქალაქეები და აქტივისტები საპროტესტო ტრანსპარანტებით მივიდნენ და სპექტაკლის დასრულების შემდეგ, ე.წ. აგენტების შესახებ კანონის წინააღმდეგ პროტესტი გამოხატეს.
,,მე მიყვარს ძალიან ჩემი ქალაქის, ჩემი ზუგდიდის თეატრი, მე არ ვარ რიგითი მაყურებელი, მე ვარ საპატიო, ერთგული მაყურებელი, ეს წოდება ამ თეატრმა მომანიჭა და მე ვამაყობ ამ წოდებით, მე მინდა დღეს გამოვხატო ჩემი პროტესტი, ჩემი ქვეყანა დღეს არის ძალიან დიდი განსაცდელის წინაშე, ძალიან დიდი, განსაცდელის, გამოწვევების წინაშე და ამიტომ მე, როგორც არა რიგითმა მაყურებელმა, არამედ როგორც საპატიო, ერთგულმა მაყურებელმა, მინდა აქედან, პარტერიდან ჩემი ადგილიდან ვუთხრა პროტესტი ამ ,,კანონს’’ - არა რუსულ კანონს!’’, - მიმართა დემოკრატიული ჩართულობის ცენტრების ქსელის ზუგდიდის ოფისის კოორდინატორმა ეკა მინჯორაიამ თეატრის დასს.

ის ამბობს, რომ თეატრს შეუძლია უთხრას ადამიანებს, რა არის ცუდი და რა - კარგი, რა არის სიბნელე და რა - სინათლე, რა - მართალი და რა - სიცრუე.

ინფორმაციისთვის, დღეს ზუგდიდის სკეიტ პარკის ტერიტორიაზე რიგითი მოქალაქეები, ევროპის დღეებს 18:00 საათზე აღნიშნავენ და ამასთან, კიდევ ერთხელ გააპროტესტებენ "აგენტების" კანონს.

შეგახსენებთ, რუსულ კანონთან დაკავშირებით, დემონსტრაციები ქვეყნის მასშტაბით რამდენიმე კვირაა მიმდინარეობს.