ქალაქ ზუგდიდის ყოფილმა მაჟორიტარმა და "ქართული ოცნების" წევრმა მერაბ ქვარაიამ პარლამენტში პრეზიდენტის ვეტოს განხილვისას თქვა, რომ დარწმუნებულია, მის კოლეგებთან და თანამოაზრეებთან ერთად, საქართველოს ისტორიაში გამარჯვებული შევა.

"ჩვენ ამერიკის ხმის თაობა ვართ, რომელიც დასავლეთს შენატროდა, როგორც იმედს, როგორც შუქურას თავისუფლებისა, როგორც პარტნიორს და მეგობარს. მეც ამ იდეალებზე გაზრდილი ვარ ვარ და მჯერა, რომ აქ, დარბაზში მყოფი ჩემი კოლეგების, გულანთებული ქართველი პატრიოტი მეგობრების და კოლეგების გვერდში, მეც შევალ საქართველოს ისტორიაში, როგორც გამარჯვებული და მერწმუნეთ, ეს ასე იქნება. ჩვენ ვითხოვთ გამჭვირვალობას, რაც დემოკრატიული სტანდარტია. ჩვენ დამოუკიდებელი, სუვერენული სახელმწიფო ვართ და შეგვიძლია მივიღოთ გადაწყვეტილება, რომელიც ჩვენს სახელმწიფოს და ხალხს სჭირდება. რა არის ამაში ცუდი და უცნაური? ჩვენი წინაპრები გვეუბნებოდნენ, ჩვენი თავი ჩვენვე გვეკუთვნოდესო. გვიყვარს პარტნიორებთან ურთიერთობა და მეგობრები, მაგრამ ჩვენ სუვერენული, დამოუკიდებელი სახელმწიფო ვართ და უნდა ვიყოთ მზად, გავხდეთ პასუხისმგებლობიანი ქვეყანა", - თქვა საკანონმდებლო ორგანოში ქვარაიამ.

მან ასევე ახსენა სტრასბურგის სასამართლოს გადაწყვეტილება, რომლითაც, მისი თქმით, ქვეყნის ყოფილ პრეზიდენტს მიხეილ სააკაშვილს და მის ხელისუფლებას დამნაშავის ვერდიქტი გამოუტანეს.

შეგახსენებთ, მერაბ ქვარაია ერთ-ერთია იმათგან, რომლებმაც პარლამენტში სამივე მოსმენით "აგენტების" კანონს მხარი დაუჭირეს.