დღეს ფოთის საკრებულოს სხდომაზე ოპოზიციონერმა დეპუტატებმა "აგენტების" კანონის პარლამენტში მიღება და პრეზიდენტის ვეტოს დაძლევა გააპროტესტეს, რასაც ოპოზიციისა და ადგილობრივი ხელისუფლების წარმომადგენლებს შორის ურთიერთბრალდებები მოჰყვა. შემდგომ კი, ფრაქცია "ახალისა" და "ენმ"-ს წევრებმა პროტესტის ნიშნად სხდომა დატოვეს.

"გუშინდელმა შულავერის კომიტეტმა განაჩენი გამოუტანა საქართველოს და ქართველ ხალხს. გარუსებასა და ჭაობში ჩაფლობას მისცეს გუშინ ხმა. მხარდამჭერთა სიას რომ კითხულობდნენ, არ მინდოდა ფოთის წარმომადგენელი ამოეკითხათ. ჩემი ქალაქი ჩემთვის ყველაფერია და იმისთვის არ მიბრძოლია მთელი ჩემი ცხოვრება, რომ ამათ რუსებისთვის ეჩუქებინათ სამშობლო. ჩვენი შვილების მომავალს არავის დავუთმობთ", - თქვა ფრაქცია "ახალის" თავმჯდომარემ დარეჯან ცხვიტარიამ.

საკრებულოში ფრაქცია "ერთიანი ნაციონალური მოძრაობის" თავმჯდომარის ანა ჯოჯუას განმარტებით, "აგენტების" კანონზე პრეზიდენტის ვეტოს დაძლევით, ხელისუფლებამ ქვეყნისთვის საზიანო და ევროატლანტიკური კურსისთვის შეუსაბამო გადაწყვეტილება მიიღო.

"დასავლეთს უთხრეს - არა, ხოლო რუსეთს უთხრეს - კი. ისინი მიდიან ჩრდილოეთისკენ, ამას კი ქართველი ხალხი არ დაუშვებს. "ენმ"-ს წევრებმა მიზანშეწონილად მივიჩნიეთ, დაგვეტოვებინა საკრებულოს სხდომა. ვიხილეთ, თუ როგორი აგრესიულები არიან და მგონია, მსგავს პოლიტიკას გააგრძელებენ. მიყვებიან იმ მიზანსა და დანიშნულებას, რასაც ივანიშვილი უკარნახებს მათ. ვეუბნები მათ, არ შეგრჩებათ ასეთი ნაბიჯები, არ გაპატიებთ ქართველი ხალხი", - აღნიშნავს ის.

მისივე თქმით, საკრებულოში "ქართული ოცნების" რიგებში არის საწინააღმდეგო განწყობებიც. როგორც ის ამბობს, ისინი არ ემხრობიან რუსეთისკენ აღებულ კურსს, მაგრამ საჯაროობას ვერ ბედავენ.

მეორეს მხრივ, "ქართული ოცნების" წევრმა ზაალ კვინჩიამ განაცხადა, რომ ოპოზიციის წევრები მოსახლეობას ატყუებენ და ბოიკოტის მიუხედავად, იმ დოკუმენტებს აწერენ ხელს, სადაც უნდა დადასტურდეს საკრებულოს წევრების დასწრება.

"რეალურად, სხდომებზე, კამერების წინ აცხადებენ ბოიკოტს, მაგრამ დოკუმენტებზე, სადაც უნდა დაადასტურონ სხდომებზე დასწრება და ამით, წესით, უნდა აიღონ ხელფასები, ამ დოკუმენტებს ხელს აწერენ. თუ ხარ პოლიტიკოსი ბოიკოტში, მაშინ ჩვენს არცერთ დოკუმენტს ხელი არ უნდა მოაწერო. მათ ხელფასის აღება უნდათ უსაქმურობაში. მათ მონებად და მოღალატეებად დაბეჭდეს ჩვენი ფოტოები, ამით კულტურული და პოლიტიკური სტანდარტები მოშალეს. ეს ფოტოები დააჭერინეს 14-15 წლის ახალგაზრდებს, რომლებიც აზრზე არ არიან როგორი პიროვნებების ფოტოები უჭირავთ, რაზეც მიიღეს პასუხი", - დასძენს ის.

რაც შეეხება "აგენტების" კანონზე ფრაქცია "ქართული ოცნების" წევრებს შორის არსებულ აზრთა სხვადასხვაობას, ის მსგავს განწყობებს უარყოფს.

"კანონის დაინიცირებიდან მიღებამდე, ჩვენი გუნდი იყო სრულიად ერთიანი პათოსშიც და მისი მიღების აუცილებლობაშიც. ეს ყველაფერი ჭორია, რომლითაც ცდილობენ, ვინმე დააჯერონ, თითქოს, განხეთქილებაა გუნდში", - განმარტავს კვინჩია.

საქართველოს პარლამენტმა პლენარულ სხდომაზე, კვლავ 84 ხმით, "აგენტების" კანონზე პრეზიდენტის ვეტო 28 მაისს დაძლია. პარალელურად, ქვეყნის მასშტაბით, თითქმის, ორი თვეა, კანონის საწინააღმდეგო საპროტესტო აქციები მიმდინარეობს. მოქალაქეების ნაწილი ამბობს, რომ ვერ შეეგუება ქვეყნის დასავლური კურსიდან გადახვევას.

საქართველოს პარლამენტმა, 84 ხმით, "უცხოური გავლენის გამჭვირვალობის შესახებ" კანონპროექტი პირველი მოსმენით - 17 აპრილს, მეორე მოსმენით - 1 მაისს, მესამე მოსმენით კი - 14 მაისს მიიღო. პრეზიდენტმა მას ვეტო 18 მაისს დაადო.


ამავე თემაზე: 

"აგენტების" კანონის მოწინააღმდეგეებმა ქალაქში მსვლელობა მოაწყეს (ფოტო)

გადაუხვია თუ არა ხელისუფლებამ ევროკავშირისკენ მიმავალი გზიდან - ადგილობრივების პასუხები (ვიდეო)

რატომ არა ე.წ აგენტების კანონს - ზუგდიდელების პასუხები (ფოტო/ვიდეო)

პარლამენტმა "აგენტების" კანონზე პრეზიდენტის ვეტო დაძლია

რუსული კანონით აფხაზეთს ვერ დავიბრუნებთ - აქცია ზუგდიდში (ფოტორეპორტაჟი)

ქვარაია, თოლორაია, ბერაია, ხახუბია - "აგენტების კანონის" მხარდამჭერები სამეგრელოდან