პარტია "დროას" წევრი და აქტივისტი მარიამ სიჭინავა, რომლის თქმითაც, გუშინ, ფიზიკურად დაუპირისპირდნენ და სიტყვიერი შეურაცხყოფა მიაყენეს, შსს-ში გამოკითხვაზე დაიბარეს. ის აღნიშნავს, რომ სამართალდამცავ ორგანოებთან არ ითანამშრომლებს, რადგან სამართლიანი გამოძიების იმედი არ აქვს.

"ოფიციალურად, გამოკითხვაზე დამიბარეს, თუმცა ჩემი პოზიცია იყო ის, რომ ამ ადამიანებმა, დაახლოებით, ერთი თვის წინ უკანონოდ დამაკავეს, სამმართველოს შენობაში სიტყვიერი შეურაცხყოფა მომაყენეს, მომექცნენ ღირსების შემლახავად, შესაბამისად, მათგან არ ველოდები ადეკვატურ გამოძიებას და არ ვაპირებ ამ მოძალადე ადამიანებს მივმართო ჩემს დასაცავად. ჩემი საჯარო პოსტი არის საფუძველი იმისა, რომ გამოძიება დაიწყონ, დანაშაული უკვე მომხდარია", - განმარტავს იგი.

სიჭინავა რადიო "ათინათთან" გუშინდელი ინციდენტის დეტალებსაც იხსენებს. მისი თქმით, მეგობართან საუბრისას, არასრულწლოვანი შვილისა და კლასელების თანხლებით, თამაზ წურწუმია მას ხელჯოხით დაუპირისპირდა.

"მეგობარს ჭიშკართან ვესაუბრებოდი რუსულ კანონზე, ვეუბნებოდი - არა რუსულ კანონს. ამას ჰქონდა ხუმრობის შემცველი სახე, რა დროსაც, მისი მეზობელი თამაზ წურწუმია, რომელიც როგორც გავარკვიე, მერიის ა(ა)იპ-ის დასუფთავების სამსახურის თანამშრომელია, გამომეკიდა გინებით, სიტყვიერი შეურაცხყოფა მომაყენა. ჩემგან ადეკვატური პასუხის მიღების შემდეგ, მან მის თანმხლებ ქალბატონს, მის მეუღლეს გამოართვა ხელჯოხი, რომელიც თავში, მხარზე და მკლავში ჩამარტყა", - დასძენს ის.

სიჭინავა, ასევე, ამბობს, რომ მსგავსი აგრესია ქვეყანაში არსებული დაუსჯელობის სინდრომის ეფექტია, რომელსაც როგორც თვითონ გვეუბნება, თბილისში ოპოზიციის წევრებისა და აქტივისტების ცემის ფაქტები ახალისებს.

შეგახსენებთ, გუშინ მან საკუთარ ფეისბუქ გვერდზე დაპოსტა, რომელშიც მის მიმართ ფიზიკურ და სიტყვიერ ანგარიშსწორებაზე საუბრობდა. 


ამავე თემაზე:

თავს დამესხა თამაზ წურწუმია, ჯოხით, რომელიც თავში მირტყა, გინებით და შეურაცხყოფებით - მარიამ სიჭინავა