სოხუმში სწრაფი კვების რუსული რესტორნების ქსელი „ვკუსნო ი ტოჩკა“ ("გემრიელია და წერტილი") არ გაიხსნება. ამის შესახებ კვების ობიექტების გენერალურმა დირექტორმა ოლეგ პაროევმა განაცხადა.
მან „რია ნოვოსტის“ უთხრა, რომ ოკუპირებულ აფხაზეთში აღნიშნული დაწესებულებები არ გაიხსნება, მიზეზად კი „რესპუბლიკის ტერიტორიული კუთვნილების საკითხთან დაკავშირებით კონფლიქტის რისკი“ დაასახელა.

„ჩვენ ყურადღებით შევისწავლეთ აფხაზეთის ბაზარი და მივედით დასკვნამდე, რომ იქ არ გავხსნით. ამას რამდენიმე მიზეზი აქვს: ერთი მხრივ, აფხაზეთი საერთაშორისო ასპარეზზე ითვლება საქართველოს კუთვნილ ტერიტორიად და იქ ფუნქციონირებს McDonald's - ის ფრანშიზა და ჩვენ არ გვინდა კონფლიქტის შექმნა“, - თქვა მან.

მისივე თქმით, უფრო მომგებიანი და ადვილია ქსელური რესტორნის გახსნა „აფხაზეთის საზღვართან ახლოს“.

ინფორმაცია იმის შესახებ, რომ რუსეთში McDonald's - ის ნაცვლად გახსნილი სწრაფი კვების რესტორნების ქსელს "ვკუსნო - ი ტოჩკა" - ს აფხაზეთის დე ფაქტო რესპუბლიკაში შესვლა სურს, ჯერ კიდევ 2022 წელს გავრცელდა.

უფრო გვიან, „რუსეთის ფედერაციაში აფხაზეთის სავაჭრო წარმომადგენელმა“ ოლეგ ბარციცმა განაცხადა, რომ „ვკუსნო ი ტოჩკა“ შესაძლოა 2023 წელსაც გამოჩნდეს და ფრანშიზა უკვე შეძენილია.

McDonald's - მა რუსეთი უკრაინასთან ომის გამო დატოვა. კორპორაციამ, მედიის თანახმად, რუსეთში ბიზნესი "იუჟკუზბასუგოლის" ქვანახშირის კომპანიის ყოფილ თანამფლობელს ნოვოკუზნეცკიდან ალექსანდრე გოვორს მიყიდა.

რუსეთმა 2008 წელს, აგვისტოს ომის შემდეგ, დამოუკიდებელ ქვეყნებად აღიარა საქართველოს აფხაზეთისა და ცხინვალის რეგიონები , იმავე წლის სექტემბერში ნიკარაგუამ ცნო აფხაზეთის დამოუკიდებლობა, 2009 კი ვენესუელამ და ნაურუმ, ხოლო 2018 წელს - სირიამ.