სოხუმის განახლებული აეროპორტიდან ფრენები რუსეთის შვიდ ქალაქში შესრულდება, საჰაერო ნავსადგურის გახსნა კი 2025 წლის დასაწყისში იგეგმება. ამის შესახებ აფხაზეთის დე ფაქტო რესპუბლიკის ე.წ. პრეზიდენტმა განაცხადა.

რუსეთში გამართული  ფორუმის ფარგლებში ასლან ბჟანიამ „რია ნოვოსტის“ უთხრა, რომ სოჭისა და კრასნოდარის გარდა, ბაბუშარას აეროპორტის პირველი მიმართულებების სიაში მოხვდნენ მოსკოვი, სანკტ-პეტერბურგი, ეკატერინბურგი, ნოვოსიბირსკი და ყაზანი. მისივე თქმით, ამჟამად აეროპორტის ტერმინალის შენობის მოდერნიზაცია და ასაფრენი ბილიკის რეკონსტრუქცია მიმდინარეობს.

2023 წლის ოქტომბერში ცნობილი გახდა, რომ ოკუპირებული აფხაზეთის ე.წ. მთავრობამ ხელი მოაწერა ხელშეკრულებას სოხუმის აეროპორტის რეკონსტრუქციის შესახებ, შპს "ინფრასტრუქტურის დეველოპმენტთან", რომლის ერთადერთი მფლობელია რუსეთის შინაგან საქმეთა სამინისტროს ყოფილი ხელმძღვანელის, ამჟამად კი რუსეთის უშიშროების საბჭოს მდივნის პირველი მოადგილის, რაშიდ ნურგალიევის ერთ - ერთი ვაჟი, რაშიდ ნურგალიევი.

რუსეთის ეკონომიკური განვითარების მინისტრის მოადგილემ დიმიტრი ვოლვაჩმა განაცხადა, რომ პროექტში ინვესტიციების მოცულობა 12 მილიარდ რუბლს გადააჭარბებს. მისივე თქმით, რუსეთიდან სოხუმის აეროპორტის მიმართულებით პირველი საცდელი რეისი წელს იგეგმება.

ცოტა ხნის წინ, ასლან ბჟანიამ აღნიშნა, რომ ბაბუშარას აეროპორტი 2024 წლის ბოლოს გაიხსნება, მიუხედავად იმისა, რომ მისი აღდგენის პროექტს „სამოქალაქო ავიაციის საერთაშორისო ორგანიზაცია (ICAO), საქართველო და ევროკავშირის ქვეყნები ბლოკავენ“.

ინფორმაციისთვის, საქართველოს სამოქალაქო საავიაციო სააგენტოს განცხადებით, საქართველოს ნებართვის გარეშე, სოხუმის აეროპორტში საერთაშორისო საჰაერო მიმოსვლა ვერ განხორციელდება. 2006 წელს სამოქალაქო ავიაციის საერთაშორისო ორგანიზაცია ICAO - მ გააუქმა სოხუმის აეროპორტის კოდი და დოკუმენტებიდან ამოიღო ინფორმაცია ამის შესახებ.