ფსოუზე, ე.წ. საგუშაგოს ზონასთან მომხდარ მკვლელობაში ეჭვმიტანილები დააკავეს, ინფორმაციას ოკუპირებული აფხაზეთის ე.წ. პროკურატურა ავრცელებს.

„გრძელდება ოპერატიული სამუშაოები, არიან პირები, რომლებიც [განყოფილებაში] მიიყვანეს, როგორც ეჭვმიტანილები საზღვართან ჩადენილ დანაშაულში, რომლის შედეგადაც დაიღუპა ერთი და დაიჭრა სამი ადამიანი. ისინი იკითხებიან, დგინდება მათი მონაწილეობა დანაშაულში“, - უთხრეს რუსეთის სახელმწიფო საინფორმაციო სააგენტო „ტასს“ აფხაზეთის დე ფაქტო რესპუბლიკის „გენერალურ პროკურატურაში“.

დე ფაქტო შსს - ს უფროსის რობერტ კიუტის განაცხადებით, „დაკავებულია ოთხი ადამიანი, სამი მათგანი აფხაზეთიდან, ერთი კი რუსეთიდანაა“.

„ჩვენ ისინი ღამით დავაკავეთ, სამი სოხუმში, ერთი კი სოჭში [აფხაზეთისა და რუსეთის შინაგან საქმეთა სამინისტროს ურთიერთქმედების ფარგლებში] ეჭვმიტანილმა ვერ მოასწრო ფსოუდან ადლერში გადასვლა, ის დააკავეს“, - აღნიშნა კიუტმა.

მანამდე დე ფაქტო რესპუბლიკის ე.წ. უშიშროების საბჭოს მდივანმა სერგეი შამბამ რუსული მედიის წარმომადგენლებს უთხრა, რომ „აფხაზეთის საბაჟო პუნქტი ჩვეულ რეჟიმში მუშაობს, არ არის საავტომობილო ტრანსპორტის შეფერხება აფხაზეთ-რუსეთის საზღვრის კვეთისას, ორივე მიმართულებით“.

23 ივნისს, ოკუპირებული აფხაზეთში მომხდარი სროლის შედეგად მოკლეს ერთი ადამიანი, სამი კი დაშავდა. დაშავებულებს შორის ერთი არასრულწლოვანია.

გაგრის რაიონის ე.წ. პროკურატურამ ფსოუს „საგუშაგოსთან“ მომხდარი მკვლელობის ფაქტზე სისხლის სამართლის საქმე აღძრა.