სოხუმის ე.წ. პროკურატურამ მილიციის ლეიტენანტ მანჩი კიახბას წინააღმდეგ ძალადობის ფაქტზე სისხლის სამართლის საქმე აღძრა.

ინფორმაციას აფხაზეთის დე ფაქტო რესპუბლიკის „გენერალური პროკურატურის“ პრესსამსახური ავრცელებს.

„წინასწარი გამოძიების ორგანომ დაადგინა, რომ ქალაქ სოხუმის შინაგან საქმეთა სამმართველოს „მაიაკის“ მილიციის განყოფილების საგამოძიებო განყოფილების თანამშრომელმა, „2024 წლის 3 თებერვალს, სამუშაო ადგილზე ყოფნისას, დაკავებულ ასტამურ საბეკიას მუშტებით სულ მცირე 11 დარტყმა მიაყენა, რითაც დააზიანა შსს-ს პრესტიჟი“, - ვკითხულობთ ინფორმაციაში.

აქვე დაზუსტებულია, რომ მოტივი შურისძიებაა საბეკიას ქმედებებისთვის - ეს უკანასკნელი მანამდე „ხელისუფლების წარმომადგენლებზე ძალადობისა და შეურაცხყოფის მიყენების ბრალდებით დააკავეს“.

ცოტა ხნის წინ, აფხაზურმა ტელეგრამ - არხმა RESPUBLICA-მ სოხუმის ე.წ. მილიციის თანამშრომლის მიერ მამაკაცის ცემის კადრები გამოაქვეყნა. მოგვიანებით ჟურნალისტებმა გაავრცელეს ინფორმაცია, რომ ძალა გამოიყენა „ახალი რაიონის“ განყოფილების თანამშრომელმა მანჩი კიახბამ, რომელიც დაკავებულს სხვა პოლიციელების თანდასწრებით ურტყამდა.

ინციდენტს აფხაზეთის თვითგამოცხადებული რესპუბლიკის „შინაგან საქმეთა სამინისტროში“ გამოეხმაურნენ და განაცხადეს, რომ შემთხვევა მიმდინარე წლის თებერვალში მოხდა. ამავე ცნობით, დე ფაქტო შსს-ს მინისტრმა გასცა ბრძანება ფაქტზე „შიდა გამოძიების“ ჩატარების შესახებ. „შემოწმების“ შედეგად, მილიციის ერთ- ერთი თანამშრომელი გაათავისუფლეს სამსახურიდან, დანარჩენები კი დაჯარიმდნენ.

ინფორმაციისთვის, მიმდინარე წლის მაისში გალში ცემის შედეგად გარდაცვლილი თემურ კარბაიას საქმეზე დაკავებული მილიციელები პატიმრობიდან გაათავისუფლეს.