ზუგდიდის მუნიციპალიტეტის საკრებულოში კვორუმის არარსებობის გამო, დაახლოებით, სამი თვეა, სხდომების განახლებას ვერ ახერხებენ. დღეს იგი 30-ედ ჩაინიშნა, თუმცა მალევე ჩაიშალა. დღის წესრიგის მიხედვით, ადგილობრივ წარმომადგენლობით ორგანოში საკრებულოს ოპოზიციონერი თავმჯდომარის, ასევე, მისი ორივე მოადგილისა და კომისიების თავმჯდომარეების გადაყენებაზე უნდა ემსჯელათ, თუმცა ადგილზე კვლავაც არ მივიდნენ "ქართული ოცნებისა" და "ნაციონალური მოძრაობის" დეპუტატები.

"მათი ბოიკოტის ფონზე, შეჩერებულია რიგი საკითხების განხილვა, მათ შორის მუნიციპალიტეტის ბიუჯეტში დამატებით 3 მილიონი ლარის ასახვა, სტიქიის სალიკვიდაციო ღონისძიებებისათვის 710 000 ლარის დამატება. ერთ-ერთი მნიშვნელოვანი საკითხი არის 1700 დევნილისათვის საცხოვრებელი სახლების მშენებლობისთვის განაშენიანების დეტალური კონცეფცია. მოვუწოდებ, ქართულ ოცნებას, პასუხისმგებლობა აიღოს საკუთარ ქმედებაზე, გამოცხადდნენ სხდომებზე და ნუ აფერხებენ ჩვენი მოქალაქეებისთვის მნიშვნელოვანი საკითხების განხილვას", - განმარტავს მუნიციპალიტეტის საკრებულოს თავმჯდომარე გიგა ფარულავა საკუთარ ფეისბუქ გვერდზე გამოქვეყნებულ მიმართვაში.

შეგახსენებთ, მან 28 ივნისს ზუგდიდის მერს და"ქართული ოცნება - დემოკრატიული საქართველოს" ადგილობრივი ორგანიზაციის თავმჯდომარეს მამუკა წოწერიას წერილით მიმართა და მოუწოდა, შეწყვიტონ საკრებულოს საქმიანობის ბოიკოტირება.

ინფორმაციისთვის, საკრებულოში თავმჯდომარისა და კომისიების წევრთა იმპიჩმენტის შესახებ წინადადება "ქართულმა ოცნებამ" და "ხალხის ძალამ" 10 აპრილს დაარეგისტრირეს. 31 მაისიდან წარმომადგენლობითი ორგანოს მუშაობა შეფერხებულია. ამ დღეს "ერთიანი ნაციონალური მოძრაობის" წევრები შენობაში არ გამოცხადდნენ, "ქართული ოცნების" დეპუტატებმა კი, სხდომათა დარბაზში ყოფნის მიუხედავად, რეგისტრაცია არ გაიარეს.

განახლებულ სხდომაზე კი პარტია "საქართველოსთვის" წარმომადგენლის გიგა ფარულავას, მისი სამივე მოადგილის - ამავე პარტიის წევრ მალხაზ თორიას, ყოფილი ენმ-სა და ამჟამად "ახალის" წევრების თემურ ბასილაიასა და კახაბერ ჩანგელიას პოსტებიდან გადაყენებას კენჭი უნდა უყარონ.

გადაწყვეტილების მისაღებად, 45 მანდატიან საკრებულოში, სულ ცოტა, 23 ხმაა საჭირო, თუმცა, "ქართულ ოცნებას" მხოლოდ 20 წარმომადგენელი ჰყავს.


ამავე თემაზე:

ზუგდიდის საკრებულოში თავმჯდომარისა და კომისიის ხელმძღვანელების გადაყენება 21-ედ გადაიდო

ოპოზიციონერი საკრებულოს თავმჯდომარის გადაყენების საკითხი ზუგდიდში კვლავ გადაიდო

ზუგდიდის საკრებულოში "ენმ" და "ქართული ოცნება" არ გამოცხადდა - თავმჯდომარის გადაყენება კვლავ გადაიდო

სხდომა, რომელზეც საკრებულოს ოპოზიციონერი თავმჯდომარე და მისი მოადგილეები უნდა გადაეყენებინათ, ჩაიშალა

ოპოზიციონერი თავმჯდომარისა და კომისიების ხელმძღვანელების გადაყენება, შეუმდგარი კვორუმი და ბრალდებები - რა ხდება ზუგდიდის საკრებულოში

მომავალ კვირაში ზუგდიდის საკრებულო ოპოზიციონერი თავმჯდომარის, მოადგილეებისა და თანამდებობის პირების გადაყენებას განიხილავს