ამერიკულმა თეთრმა პეპელამ ოჩამჩირის რაიონს დიდი ზარალი მიაყენა, ამის შესახებ “აფსნიპრესს“ აფხაზეთის დე ფაქტო რესპუბლიკის სოფლის მეურნეობის ე.წ. სამინისტროს მცენარეთა დაცვის სამსახურის უფროსმა ვლადიმერ გერიამ განუცხადა.

მისი თქმით, მიუხედავად ამისა, „სამინისტრო“ ამ ეტაპზე არ ატარებს ფართომასშტაბიან ღონისძიებებს მავნებლის წინააღმდეგ.

„ახლა ამერიკული თეთრი პეპლის მეორე თაობაა გავრცელებული. არსებობს დიდ ტერიტორიებზე მესამე თაობის გაჩენის შესაძლებლობა და ამ შემთხვევაში, მონიტორინგი ამას გამოავლენს. ახლა, მთავარია ზომების მიღება მისი გავრცელების პრევენციისთვის“, - განმარტა მან და დასძინა, რომ ამერიკული თეთრი პეპელა „აღმოსავლეთ აფხაზეთის მცენარეებზე უფროა მოდებული, ვიდრე დასავლეთში“, რაც გამოწვეულია „ბუნებრივი მახასიათებლებით“.

„ამერიკული თეთრი პეპელა პოლიფაგური მავნებელია და აზიანებს 300-ზე მეტ სახეობის ხეხილს, დეკორატიულ და ტყის კულტურას. იკვებება თუთის, ვაშლის, მსხლის, ბოსტნეულის კულტურებით. ამრიგად, ის აზიანებს ნათესებსა და მცენარეებს. მაგრამ ციტრუსებისთვის უვნებელია“, - განმარტავს გერია.

აფხაზეთში ამერიკული თეთრი პეპელა 2018 წელს გამოჩნდა, გავრცელებული ინფორმაციით, მან რესპუბლიკაში სოჭიდან შემოაღწია. მავნებლის წინააღმდეგ მიმართული ღონისძიებები რესპუბლიკაში 2019 წელსაც გატარდა მთელს სანაპირო ზოლზე. მაშინ მწერი ყველაზე მეტად გულრიფშის, ოჩამჩირის და სოხუმის რაიონებში იყო გავრცელებული, ხოლო უფრო გვიან 2022 წელს გუდაუთის სოფლები დააზარალა.