სვანეთში, სოფელ ეცერის მიმდებარე ტერიტორიაზე მიწა ჩამოიშალა, რის გამოც გზა რამდენიმე საათი ჩაკეტილი იყო.

ინფორმაცია ფოტოსთან ერთად სოციალურ ქსელში მოქალაქე ნინი ნაკანმა გუშინ საღამოს გაავრცელა.

,,ორი საათი გავიდა რაც მეწყერის პირისპირ ვდგავართ უამრავი ადამიანი. პირველი მანქანით ჩვენ გავჩერდით და ამის შემდეგ 50 - მდე მანქანაა მოგროვდა ირგვლივ, რომელშიც უამრავი ტურისტი, ბავშვი, მოხუცი და ახალგაზრდები ვართ თავმოყრილი და შევცქერით უზარმაზარ ტალახისა და ქვის მასას, ეს ყველაფერი ხდება მესტიისაკენ მიმავალ ცენტრალურ გზაზე ეცერთან ახლოს, შავღელეზე. ორი საათია პანიკაში მყოფი ხალხი ერთმანეთს ვამხნევებთ და იმედით ველოდებით ტექნიკას, რომელიც უნდა მოვიდეს და გაწმინდოს აქაურობა, მაგრამ ამაოდ… ყველაფერს ართულებს ის რომ წვიმს და ძალიან ცივა, ამავდროულად უკვე ღამდება და რეაგირება არ ჩანს არანაირი. იქნებ ყურადღება გამოიჩინოთ და შექმნათ წინასწარ ისეთი სიტუაცია, რომ ასეთ მომენტებში დროული რეაგირება მოხდეს, სირცხვილი ტურიზმის განვითარებაზე რომ ისევ გვაქვს პრეტენზია… ელემენტარული ადგილობრივი მოსახლეობა არ იმსახურებს მსგავს დამოკიდებულებას’’, - წერს ის.

საავტომობილო გზების დეპარტამენტმა დღეს დილით რადიო ,,ათინათს’’ დაუდასტურა, რომ გუშინ საღამოს ძლიერი ნალექის შედეგად, ტალახის მასამ გზა ჩაკეტა, მათივე ინფორმაციით, ამ ეტაპზე შიდასახელმწიფოებრივი მნიშვნელობის ზუგდიდი-ჯვარი-მესტია-ლასდილის საავტომობილო გზის კმ116 მონაკვეთზე, მოძრაობა ცალმხრივად აღდგენილია.