საქართველოს პარლამენტის რიგგარეშე სხდომაზე მიღებული გადაწყვეტილებით, საქართველოში ზოგადი განათლების საფეხურების კანონში ცვლილება შევიდა.

კერძოდ, იგი ეხება საფეხურების შემდეგნაირად გადანაწილებას:

დაწყებითი - 6 წელი - I-VI კლასები

საბაზო - 4 წელი - VII-X კლასები

საშუალო - 2 წელი - XI-XII კლასები

ახალი კანონით, საბაზო განათლების ეტაპი 1 წლით იზრდება და 4 წლით განისაზღვრება, საშუალო განათლება კი მცირდება 2 წლამდე, ხოლო სრული ზოგადი განათლება კვლავ 12-წლიანი იქნება.

"საკმაოდ მაღალია იმ მოსწავლეთა რაოდენობა, რომლებიც სკოლას მე-9 კლასის შემდეგ ტოვებენ (3 200-მდე მოსწავლე 2023 წელს), ხოლო მათი შრომის ბაზარზე დასაქმების პერსპექტივა ძალიან დაბალია - 9 კლასის დამთავრებით მიღებული ცოდნიდან და ასაკიდან გამომდინარე, ვინაიდან სკოლაში შესვლის ასაკი 6 წელია, ხოლო "შრომის კოდექსის" თანახმად, ფიზიკური პირის შრომითი ქმედუნარიანობა წარმოიშობა 16 წლიდან", - აღნიშნავს განათლების სამინისტრო.

კანონპროექტის ავტორები აღნიშნავდნენ, რომ მზარდია მოსწავლეთა ისეთი რისკების წინაშე დადგომის ალბათობა, როგორიცაა ბავშვთა ქორწინება, ასაკის შეუსაბამო დასაქმება, ტრეფიკინგი, კანონსაწინააღმდეგო ქმედებები და არასრულწლოვანთა მართლმსაჯულების სისტემაში მოხვედრა და სხვა.

სამინისტროს განმარტებით, კანონპროექტის მიღების შედეგად, მოსწავლეები უფრო მომზადებულები იქნებიან ზოგადსაგანმანათლებლო და პროფესიულ სასწავლო დაწესებულებებში სწავლის გაგრძელების თვალსაზრისით.