ოჩამჩირეში, პორტის მიმდებარე ტერიტორიაზე, საკონტეინერო ტერმინალი შენდება. მისი მშენებლობა “შეღავათიანი დაკრედიტების საინვესტიციო პროგრამის” ფარგლებში, მიმდინარეობს, რომელსაც აფხაზეთის დე ფაქტო რესპუბლიკა რუსეთის ფედერაციასთან ერთად ახორციელებს, წერს „აფსადგილ ინფო“.

ამავე ცნობით, ტერმინალს ე.წ. პრეზიდენტის ასლან ბჟანიას დავალებით აშენებენ, „საერთაშორისო სატრანსპორტო კორიდორის განვითარებისთვის“.

გამოცემის თანახმად, ობიექტი 250 მეტრი სიგრძისა და 500 მეტრი სიგანის პლატფორმას წარმოადგენს, რომელიც აღჭურვილია სარკინიგზო ლიანდაგებით და ვაგონების გადმოტვირთვის ზონით. ტერიტორიაზე შექმნილია 1200 კონტეინერზე გათვლილი გადაზიდვა - შენახვის ზონები. ინფრასტრუქტურა მოიცავს ხანძარსაწინააღმდეგო და სამაცივრე კონტეინერების განთავსებისთვის აუცილებელ სისტემებს, „რაც მომავალში რუსეთში ციტრუსის და სხვა მალფუჭებადი საქონლის გაგზავნის შესაძლებლობებს გაზრდის“. აქვე ვკითხულობთ, რომ ტერმინალის ამოქმედების შემდეგ, 300 კონტეინერის ტევადობის ხომალდების დატვირთვა გახდება შესაძლებელი, ხოლო ამწე ტექნიკის მართვას ადგილობრივ სპეციალისტებს ჩინეთიდან მიწვეული ინჟინერი ასწავლის. ამავე ინფორმაციით, სამშენებლო სამუშაოები აგვისტოს ბოლოს დასრულდება, ტერმინალი კი ექსპლუატაციაში სექტემბერში ჩაეშვება.

ცოტა ხნის წინ, აფხაზმა ლიდერმა ასლან ბჟანიამ ოჩამჩირეში გასვლითი თათბირი გამართა, რომელზეც აღნიშნა, რომ „ოჩამჩირის, ტყვარჩელის და გალის რეგიონების სოციალურ-ეკონომიკური განვითარებისთვის გადაუდებელ აუცილებლობას წარმოადგენს „აპარტამენტების“ შესახებ კანონის მიღება. 

იმავე შეხვედრაზე მან განაცხადა, რომ რუსული ელექტრომატარებელი „ლასტოჩკა“ 2025 წელს ოჩამჩირემდეც ივლის, ხოლოს ოჩამჩირის საზღვაო პორტში გაიხსნება მსხვილი საწარმო, რომელიც საკონტეინერო და სატვირთო გადაზიდვებს განახორციელებს.

“აპარტამენტების” შესახებ კანონპროექტი კანონპროექტი აფხაზეთის დე ფაქტო რესპუბლიკის “პარლამენტის“ ეკონომიკური პოლიტიკისა და რეფორმების კომიტეტმა 17 ივლისს მოიწონა, რასაც სოხუმში საპროტესტო აქცია მოჰყვა.

სწორედ ბჟანია არის "აპარტ-ოტელებისა და აპარტამენტების სამართლებრივი მდგომარეობის მოწესრიგების შესახებ" კანონპროექტის ინიციატორი. მის ინიციატივას მწვავედ აკრიტიკებენ, როგორც ადგილობრივი ოპოზიციური პარტიები, ასევე საზოგადოებრივი ორგანიზაციები. 

ოპონენტები მიიჩნევენ, რომ ეს არის უძრავი ქონების რუსეთისთვის გადაცემის ფარული ფორმა. ბჟანიას "ადმინისტრაციის" მიერ მომზადებული კანონპროექტის მიხედვით, 10-12 წლის განმავლობაში აფხაზეთის მთელ ტერიტორიაზე უნდა აშენდეს აპარტ-ოტელები, ჯამში 30 ათასი აპარტამენტით (ერთ რაიონში არაუმეტეს 5 ათასისა).

გასული წლის ოქტომბერში ბჟანიამ განაცხადა, რომ ოჩამჩირის რაიონში რუსული სამხედრო-საზღვაო ფლოტის მუდმივი ბაზის განთავსება იგეგმება.