ფოთში დიალიზის სახელმწიფო სერვისის ამოქმედების შესახებ ინფორმაციას ჯანდაცვის სამინისტრო ავრცელებს.

უწყების ცნობით, ადგილზე, ჯანდაცვის მინისტრი, მიხეილ სარჯველაძე იმყოფებოდა, რომელმაც ცენტრი დაათვალიერა და სამედიცინო პერსონალსა და პაციენტებს შეხვდა.

,,პრობლემის გადაჭრის მიზნით, აქტიურად მიმდინარეობდა თანამშრომლობა სამინისტროსა და ადგილობრივ ხელისუფლებას შორის. შედეგად კი, ფოთის მოსახლეობას, ახალი, მაღალი სტანდარტების შესაბამისი, დიალიზის ცენტრი აქვს. ჯანდაცვის მინისტრმა, ხაზი გაუსვა, რომ სამინისტროს პრიორიტეტი, მოსახლეობისთვის, მაღალი ხარისხის სამედიცინო სერვისებზე თანაბარი ხელმისაწვდომობის უზრუნველყოფაა, პროცესში გამოკვეთილ ხარვეზებზე კი მყისიერი რეაგირება ხდება. ცენტრის გახსნამდე, პაციენტები, უახლოეს მუნიციპალიტეტში იღებდნენ სამედიცინო მომსახურებას. მათ ტრანსპორტირებას კი ფოთის მერია უზრუნველყოფდა'', - ნათქვამია სამინისტროს მიერ გავრცელებულ ინფორმაციაში.

ცნობისთვის ფოთის მუნიციპალიტეტში, ბენეფიციარები დიალიზის სერვისს, 2021 წლიდან ერთ-ერთ კერძო კლინიკაში იღებდნენ, თუმცა ადგილზე, სერვისის მიღების შესაძლებლობა, დაახლოებით, ერთი თვეა შეეზღუდათ.

ამავე თემაზე:

ფოთში დიალიზის ახალი კაბინეტი რამდენიმე დღეში ამოქმედდება