ზუგდიდის რეფერალურმა ჰოსპიტალმა საერთაშორისო სამედიცინო კომპანიისგან აკრედიტაცია მიიღო. ამის შესახებ რადიო "ათინათს" საავადმყოფოს კლინიკურმა ხელმძღვანელმა სულხან ორჟონიამ უთხრა.

როგორც ის ამბობს, გერმანულმა მააკრედიტებელმა კომპანიამ (KTQ) პაციენტების უსაფრთხოების, ჰოსპიტლის ინფრასტრუქტურისა და მენეჯმენტის ყველა დეტალი შეისწავლა, აკრედიტაციის გაცემა კი მათი დადებითი შეფასების საფუძველზე მოხდა.

"ჩვენი კლინიკის მიერ გაფორმდა ხელშეკრულება გერმანულ კომპანიასთან, რომელიც ამოწმებს ჰოსპიტალში როგორც ინფრასტრუქტურულ, ასევე პაციენტების უსაფრთხოებასა და ზოგადად, კლინიკის ხარისხს. აღნიშნული კომპანია არის ხარისხისა და პროცესების მართვის მააკრედიტებელი ორგანიზაცია. განსაკუთრებით, ბოლო თვეების განმავლობაში, მიმდინარეობდა სხვადასხვა სამუშაო პროცესი, მათ შორის ტრენინგები პაციენტთა უსაფრთხოების და ხარისხის გაუმჯობესების მიზნით. ბოლო ორი დღის მანძილზე ადგილზე შეფასდა ყველა განყოფილების მუშაობა, სადაც ხარისხის მაჩვენებლის ინდიკატორი შემოწმდა პაციენტის უსაფრთხოებისა და მართვის კუთხით. დააკვირდნენ პროცესს პაციენტის მიღებიდან მის გაწერამდე, დოკუმენტწარმოებისა და მისი მართვის კუთხით და კლინიკამ მიიღო უმაღლესი შეფასება და გახდა აკრედიტებული ჰოსპიტალი", - ამბობს ორჟონია. 

მისივე თქმით, ჯანდაცვის მინისტრის 2023 წლის ბრძანების მიხედვით, ყველა კლინიკა, რომელიც საქართველოს მასშტაბით ფუნქციონირებს და სურს სახელმწიფო პროგრამებში მონაწილეობის მიღება 2024 წლის 31 დეკემბრისთვის უნდა იყოს აკრედიტებული საერთაშორისო მააკრედიტებელი კომპანიების მიერ.

ჯანდაცვის სამინისტრო განმარტავს, რომ რეფორმების მიზანი საერთაშორისო სტანდარტების დანერგვა, მოქალაქეებისთვის ხარისხიანი სამედიცინო მომსახურების უზრუნველყოფა და ხარისხის კონტროლის მძლავრი მექანიზმების შექმნაა.