წალენჯიხის მუნიციპალიტეტში, ადგილობრივი ხელისუფლების წარმომადგენლებმა პატივი მიაგეს რუსეთ-საქართველოს 2008 წლის აგვისტოს ომში დაღუპული პირების ხსოვნას. ამის შესახებ ინფორმაცია მუნიციპალიტეტის მერიამ საკუთარ ფეისბუქ გვერდზე გამოაქვეყნა.

"2008 წლის აგვისტოს მოვლენებიდან, რუსეთ-საქართველოს ომიდან 16 წელი გავიდა. მუნიციპალიტეტის ხელმძღვანელმა პირებმა პატივი მიაგეს რუსული აგრესიის შედეგად დაღუპული მეომრის, წალენჯიხელის, ჯგალის მკვიდრის კაპრალი კობა ხარჩილავას ხსოვნას, რომელიც 2008 წლის აგვისტოს თვეში,რუსეთ-საქართველოს ომის დროს ცხინვალის მისადგომებთან დაიღუპა. მხედრული მამაცობისთვის კი ის ოქროს მედლით დაჯილდოვდა" - აცხადებენ მერიაში.
ამავე ცნობით, მათ ომში დაღუპული სამოქალაქო პირების, ნაკიფუელი კეკე, დოდო და ენვერ ჭანიების, ასევე, წალენჯიხის ყოფილი გამგებლის, აგვისტოს ომის მონაწილის, გიორგი მებონიას საფლავები თაიგულებით შეამკეს.

შეგახსენებთ, დღეს, 7 აგვისტოს, რუსეთ-საქართველოს აგვისტოს ომიდან 16 წელი გავიდა. 2008 წელს, ამ დღეს, გამთენიისას, რუსეთის რეგულარულმა სამხედრო ძალებმა, რომლებსაც მშვიდობისმყოფელთა სტატუსი არ ჰქონდათ, საქართველოს ტერიტორიაზე წამოიწყეს სამხედრო აგრესია. ამას, 23:35 საათზე ქართული სამხედრო ძალების ცხინვალისკენ გადაადგილება და საპასუხო ცეცხლი მოჰყვა. 12 აგვისტოს, რუსეთსა და საქართველოს შორის ცეცხლის შეწყვეტის შეთანხმება დაიდო.

ოფიციალური ინფორმაციით, 2008 წლის ომში თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი, 224 სამოქალაქო პირი და 3 ჟურნალისტი დაიღუპა. დაჭრილ და დაშავებულ სამოქალაქო და სამხედრო პირთა რაოდენობა სულ 2 232-ს შეადგენს, მათგან 1045 სამხედრო მოსამსახურეა. კონფლიქტის დროს, დაიჭრა 12 ჟურნალისტი.


ფოტო: წალენჯიხის მუნიციპალიტეტის მერია

ამავე თემაზე:

მხარდამჭერი გზავნილები დასავლეთიდან - საქართველოს პარტნიორი სახელმწიფოები და ორგანიზაციები 2008 წლის რუსეთ-საქართველოს აგვისტოს ომს ეხმაურებიან

დღეს რუსეთ-საქართველოს აგვისტოს ომის მე-16 წლისთავია

ევროკავშირის ერთგულება საქართველოში კონფლიქტების მშვიდობიანი მოგვარების მიმართ კვლავ ურყევია - ჯოზეფ ბორელი