ჰუმანიტარული ტვირთი, რომელიც სეპარატისტული დონბასისთვის იყო განკუთვნილი, სოხუმმა კურსკის რეგიონში გადაამისამართა, ბატალიონ „პიატნაშკას“ ადგილმდებარეობის მიხედვით. ინფორმაციას აფხაზეთის დე ფაქტო რესპუბლიკის საგანგებო სიტუაციების მართვის სამინისტროს პრესსამსახური ავრცელებს.

„რუსეთის ახალ რეგიონებთან ურთიერთობის საკითხებში" ოკუპირებული აფხაზეთის ე.წ. პრეზიდენტის სპეციალური წარმომადგენლის, ლევ კვიცინიას თქმით, მათ დაუყოვნებლივ მიიღეს გადაწყვეტილება მარშრუტის შეცვლის შესახებ. 

„აფსნიპრესის“ თანახმად, კვიცინია კურსკის ოლქის გუბერნატორის მოვალეობის შემსრულებელმა ალექსეი სმირნოვმა მიიღო, რის შემდეგაც, ის ე.წ. დონეცკის სახალხო რესპუბლიკაში გაემგზავრა, სადაც ჰოსპიტალში დაჭრილი აფხაზი მოხალისეები მოინახულა. უკრაინაში რუსეთის მხარეს მებრძოლი აფხაზი მოხალისეები, ძირითადად, „პიატნაშკას“ ბატალიონში ირიცხებოდნენ.

მანამდე, „დონბასის ველური დივიზიის“ მეთაურმა, აფხაზმა მებრძოლმა ახრა ავიძბამ გაავრცელა ინფორმაცია, რომ აფხაზი მოხალისეები კურსკის ოლქში გადაისროლეს. 2023 წლის ნოემბერში მან განაცხადა , რომ „პიატნაშკა“ გაფართოვდა და ჩამოყალიბდა „დონბასის ველური დივიზია“, რომელშიც სხვა დანაყოფებიც შედიან.

რუსეთმა 6 აგვისტოს გამოაცხადა, რომ უკრაინის შეიარაღებული ძალების სამხედროები კურსკის ოლქის ტერიტორიაზე შეიჭრნენ. 7 აგვისტოდან კურსკის ოლქში საგანგებო მდგომარეობის რეჟიმი ამოქმედდა.