საქართველოს პრემიერ-მინისტრმა ირაკლი კობახიძემ სამეგრელოში 3 დელეგატი წარადგინა. მისი თქმით, ისინი რეგიონში "ქართული ოცნების" სარჩევნო კამპანიას გაუძღვებიან.

კერძოდ, ზუგდიდში დელეგატი დავით კოდუა იქნება. ის გუბერნატორის ყოფილი მოადგილე და 2012 წლიდან "ქართული ოცნების" წევრია.

ფოთში, ხობსა და სენაკში წარდგენილია მოქმედი დეპუტატი გიორგი ხახუბია, ხოლო მარტვილში, აბაშაში, წალენჯიხასა და ჩხოროწყუში ილია ინჯია.

ირაკლი კობახიძის განცხადებით, დელეგატები არიან პარტიის პროპორციულ საარჩევნო სიაში წარმოდგენილი კანდიდატები, რომლებიც კონკრეტულ საარჩევნო ოლქებში კამპანიის წარმოებაზე და უკვე არჩევნების შემდეგ, საქართველოს პარლამენტში შესაბამისი ამომრჩევლის ინტერესების დაცვაზე იქნებიან პასუხისმგებელი.

"როგორც მოგეხსენებათ, 26 ოქტომბრის საპარლამენტო არჩევნები ჩატარდება სრულად პროპორციული სისტემით. ასევე იცით, რომ მაჟორიტარული სისტემის გაუქმებას აქვს სერიოზული უარყოფითი მხარეები, რაც, პირველ რიგში, ამომრჩეველსა და კანდიდატებს შორის კავშირის შესუსტებით გამოიხატება. ამ ნაკლოვანების გარკვეულწილად აღმოსაფხვრელად, საარჩევნო კანონმდებლობით შემოღებულ იქნა დელეგატის ინსტიტუტი", - განაცხადა პრემიერმა.

ის ამბობს, რომ მომდევნო მოწვევის პარლამენტში უკლებლივ ყველა ქალაქს და რეგიონს ეყოლება თავისი წარმომადგენელი და ამით ნაწილობრივ აღმოიფხვრება ის ნაკლოვანება, რომელიც მისივე თქმით, დაკავშირებულია მაჟორიტარული სისტემის გაუქმებასთან.