ცოტა ხნის წინ აფხაზური ტელეგრამ არხები იტყობინებოდნენ სკანდალის შესახებ, რომელიც ქართული წარმოშობის რუსი ბიზნესმენის ერასტი ბუკიას დაბა განთიადში (ცანდრიფში) ჩასვლას მოჰყვა.

„აფხაზეთის პორტალი“ 5 აგვისტოს წერდა, რომ ის დაკრძალვაზე დასწრებას და უკან დაბრუნებას გეგმავდა. აქვე მითითებული იყო, რომ ბუკიას ორმაგი, საქართველო - რუსეთის მოქალაქეობა აქვს. შეტყობინებაში აღნიშნული იყო, რომ დე ფაქტო უსაფრთხოების სამსახურს ბუკია წარუდგინეს, როგორც „სერიოზული კავშირების მქონე“ რუსი ბიზნესმენი, რომელიც, „აფხაზეთის ერთ-ერთ სამინისტროში მუშაობდა“.

ამავე ცნობით, „სასაზღვრო“ სამსახურმა ერასტი ბუკიას შესახებ მონაცემები „სახელმწიფო უსაფრთხოების სამსახურს“ გადასცა, მათი გადამოწმების შემდეგ კი გაირკვა, რომ მამაკაცი აფხაზეთში დაიბადა, გაგრის რაიონი 1992 წლის შემოდგომაზე დატოვა და „არ მიუღია მონაწილეობა აფხაზეთის წინააღმდეგ სამხედრო მოქმედებებში“.

დე ფაქტო სუს - მა ბუკიაზე ოკუპირებულ აფხაზეთში შესვლის ნებართვა გასცა, თუმცა, დაკრძალვის შემდეგ ბუკია ჩავიდა დაბა ცანდრიფშში და მოინახულა სახლი, რომელშიც ომამდე ცხოვრობდა. აქ მან საჯაროდ განაცხადა, რომ „აუცილებლად დაბრუნდება საცხოვრებლად აფხაზეთში”, და რომ ”არ არსებობს ცალკე აფხაზეთი – არსებობს მხოლოდ ერთიანი საქართველო”.  

"სანამ ცანდრიფშის მცხოვრებლები სახელმწიფო უსაფრთხოების სამსახურში რეკავდნენ, მას მოაკითხეს ავტომანქანით და გაურკვეველი მიმართულებით წაიყვანეს“, - ვკითხულობთ ინფორმაციაში.

„აფხაზეთის პორტალი“, დე ფაქტო სუს - ის წყაროზე დაყრდნობით, წერდა, რომ უწყებას ბუკიას აფხაზეთში შეშვების თხოვნით, „უშიშროების საბჭოს მდივნის“ სერგეი შამბას ვაჟმა, მოსკოვში „აფხაზეთის სავაჭრო პალატის“ წარმომადგენლის მოადგილემ, ორჰან შამბამ მიმართა.“ დე ფაქტო სუს - ი ორჰან შამბას დაუკავშირდა და სწორედ მან მიიყვანა ბუკია დაკითხვაზე რის შემდეგაც, ის „გაადეპორტეს“ რუსეთში, მის ოჯახს კი „აფხაზეთში შესვლა აეკრძალა“.

„ეხო კავკაზას“ თანახმად, ორჰან შამბას, მომხდართან დაკავშირებით, კომენტარი არ გაუკეთებია, თუმცა, უკმაყოფილება და მასთან შეხვედრის სურვილი აფხაზმა ვეტერანებმა გამოთქვეს და ამ საკითხს აქტიურად განიხილავენ სოციალური ქსლების აფხაზურ სეგმენტში.  „აფხაზური პორტალის“ პუბლიკაციიდან ერთ დღეში, „უშიშროების საბჭოს“ მდივანი სერგეი შამბა თანამდებობიდან გაათავისუფლეს და ის მესამედ დაინიშნა „საგარეო საქმეთა მინისტრად“.