ყოფილმა პრემიერ-მინისტრმა გიორგი გახარიამ პარტიის “საქართველოსთვის” ზუგდიდის ოფისი გახსნა და შეხვედრა ადგილობრივ მხარდამჭერებთან გამართა.

მან სიტყვით გამოსვლისას აღნიშნა, რომ მმართველ პარტიას მშვიდობის შენარჩუნებაზე საუბრის უფლება არ აქვს.

„როდესაც „ოცნებასთან“ ჩვენი გზები გაიყო და გაიყო მაშინ, როცა აშკარა გახდა, რომ ადამიანები იმისთვის, რომ თბილი კაბინეტები, სავარძლები, ძალაუფლება და მოპარული ფული შეენარჩუნებინათ, ღირსება დაკარგეს. ისინი დღეს მზად არიან ქვეყნის ინტერესების წინააღმდეგ წავიდნენ. აფხაზეთს და სამაჩაბლოს არავინ გვაჩუქებს! რუსეთს, ჩვენ ნაცვლად, ოკუპაციაზე არავინ და ვერავინ დაელაპარაკება. ამ ყველაფრიდან ჩვენი ყველაზე დიდი გამოსავალი არის, რა თქმა უნდა, არჩევნები, რომელზეც, მე დარწმუნებული ვარ, „ოცნება“ მიიღებს საკადრის პასუხს“, - განაცხადა გიორგი გახარიამ.

ღონისძიებაზე შეკრებილები იყვნენ პარტიის წარმომადგენლები სამეგრელოს რაიონებიდან, მათ შორის სენაკი-ჩხოროწყუ-ზუგდიდის დეპუტატი ალეკო მოწერელია, ზუგდიდის ყოფილი მერი გეგა შენგელია და ზუგდიდის საკრებულოს მოქმედი თავმჯდომარე გიგა ფარულავა.

გახარის თქმით, 26 ოქტომბრის არჩევნები გარდამტეხი ცვლილებების მომტანი იქნება ქვეყნისთვის, რომელიც ქვეყანას განავითარებს, ვინაიდან მისი შეფასებით, „ქართული ოცნების“ მთავარი ძალა ახლა კორუფცია და ნეპოტიზმია.