წალენჯიხის მუნიციპალიტეტის სოფელ მუჟავაში, ჩვინარეს ხეობაში არქეოლოგიური ექსპედიციის შედეგად, მე-10 საუკუნის დარბაზული ტიპის ტაძარი აღმოაჩინეს. ამის შესახებ ინფორმაცია წალენჯიხის მუნიციპალიტეტის ფეისბუქ გვერდზე გამოქვეყნდა.

მუნიციპალიტეტის მერის მოადგილე თამარ ბელქანია რადიო "ათინათს" ეუბნება, რომ ამ ეტაპზე ტაძრის შესახებ ძალიან მწირი ცნობები არსებობს და უკვე მიმდინარეობს ნანგრევების სიღრმისეული შესწავლა.
"შეიძლება ითქვას, რომ სამეგრელო არქეოლოგიური ექსპედიციებით დიდად განებივრებული არ არის. ბოლოს, ალბათ, ნაპო ზაქარაიას ნოქალაქევი იყო ყველაზე მნიშვნელოვანი არქეოლოგიური ექსპედიცია. შარშან, მუჟავაში, ჩვინარეს ხეობაში არქეოლოგიური ინსტიტუტების დოქტორანტები მუშაობდნენ სამარხზე, რომლის გასუფთავების შემდეგ, აღმოჩნდა ტაძრის კედლები და დაიგეგმა ექსპედიცია. ის წალენჯიხის მერიის მიერ 10 000 ლარით დაფინანსდა. გამოცხადდა ტენდერი, რომელშიც გაიმარჯვა "მთის კულტურული მემკვიდრეობის ცენტრმა". დაიწყო არქეოლოგიური ექსპედიცია, გაიწმინდა მიდამო და აღმოჩნდა მე-10 საუკუნის პატარა დარბაზული ტიპის ტაძარი, რომლის შესახებ აქამდე არაფერი არ ვიცოდით", - განმარტავს ის.

მისივე თქმით, შემორჩენილი ტაძრის კედლები, დაახლოებით, ორ მეტრს უტოლდება.


ფოტო: წალენჯიხის მუნიციპალიტეტის მერია