ზუგდიდის მუნიციპალიტეტის სოფელ დარჩელში "ერთიანობა - ნაციონალური მოძრაობის" წევრები ადგილობრივ მოსახლეობას შეხვდნენ და წინასაარჩევნოდ რეგიონული ოფისი გახსნეს.

კოალიციის ერთ-ერთმა წარმომადგენელმა ანა წითლიძემ სიტყვით გამოსვლაში აღნიშნა, რომ წელს საარჩევნო ველი ზუგდიდში და, ზოგადად, სამეგრელოში განსხვავებულია. მისი თქმით, ის ადამიანები, რომლებიც რეგიონში ბოლო არჩევნებზე მხარს "ქართულ ოცნებას" უჭერდნენ, რადიკალურად შეიცვალნენ.

"ძალიან დიდი მადლობა თორმეტწლიანი უღალატო ბრძოლისთვის, მადლობა თორმეტწლიანი უღალატო ერთგულებისთვის. თქვენ ხართ ის ადამიანები, ვინც "ერთიანი ნაციონალური მოძრაობის" სახელით უნდა შევიდეს ბრძოლაში, უნდა იყოთ ჩვენი სოფლის, ჩვენი უბნის წარმომადგენლები. სწორედ თქვენს მტკიცედ დგომაზეა დამოკიდებული ის, თუ როგორ დავიცავთ ჩვენ ჩვენს ხმებს. მე აქ ვხედავ უამრავ ისეთ ადამიანს, რომელსაც არაერთი ომი აქვს გადატანილი არჩევნების დღეს, ხმების დაცვის დროს, ამიტომ, კიდევ ერთხელ მადლობა ყველას!". - თქვა მან.

თინათინ ბოკუჩავამ ყურადღება გაამახვილა 26 ოქტომბრის არჩევნებში სამეგრელოს როლზე და განმარტა, რომ ისტორიულ ცვლილებებში, რომლებმაც ქვეყანას კეთილდღეობა და ევროატლანტიკური პერსპექტივა მოუტანა, სამეგრელოს წვლილი ყოველთვის განსაკუთრებულია.

"როგორ შეიძლება, რომ სამეგრელოს მსგავსი პოტენციალის რეგიონი არ ცხოვრობდეს კეთილდღეობაში. ერთადერთი ამის მიზეზი არის ის კორუფცია, კლანური მმართველობა, რაც მოიტანა ივანიშვილმა 12 წლის მანძილზე. ჩვენ გვაქვს შანსი, ჩვენ გვაქვს არჩევანი 26 ოქტომბერს, რომ ავირჩიოთ კეთილდღეობა ევროპაში, ან სიღატაკე იზოლაციაში და დარწმუნებული ვარ, რომ სამეგრელო და მთელი საქართველო აირჩევს კეთილდღეობას ევროპაში და უარს ეტყვის სიღატაკეს იზოლაციაში. ეს არის რეალური არჩევანი, რომლის წინაშეც ჩვენ ვდგავართ", - აღნიშნა ბოკუჩავამ

"ერთიანობა - ნაციონალური მოძრაობის" წარმომადგენლები სამეგრელოში წინასაარჩევნო კამპანიას აგრძელებენ. დღეს ისინი წალენჯიხის მუნიციპალიტეტში მოსახლეობას შეხვდებიან. 


ფოტო: ანა წითლიძის ფეისბუქ გვერდი