სტატისტიკის ეროვნული სამსახურის "შინამეურნეობებში საინფორმაციო და საკომუნიკაციო ტექნოლოგიების გამოყენების 2024 წლის გამოკვლევის" მიხედვით, სამეგრელო-ზემო სვანეთში მოსახლეობის 85.9 პროცენტი უზრუნველყოფილია ინტერნეტით, 14.1%-ს კი მასზე წვდომა არ აქვს.

კვლევის თანახმად, 15 წლის და უფროსი ასაკის მოქალაქეებში ძირითადად ინტერნეტის გამოყენების მიზნებს წარმოადგენდა: ინტერნეტ (აუდიო/ვიდეო) კავშირი (94.7%), სოციალური ქსელების გამოყენება (94.6%), ინტერნეტ ბანკინგით სარგებლობა (50.4%), ჯანმრთელობის საკითხებზე ინფორმაციის მოძიება (47.2%), ონლაინ ახალი ამბების/გაზეთების/ჟურნალების წაკითხვა (46.6%), საქონლისა და მომსახურების შესახებ ინფორმაციის მოძიება (43.1%), ელ. ფოსტის მიღება/გაგზავნა (37.9%), პროგრამული უზრუნველყოფის პროდუქტის (გარდა თამაშებისა) ჩამოტვირთვა (15.5%) და სამუშაოს ძიება ან სამუშაოსთვის აპლიკაციების გაგზავნა (11.8%).

რაც შეეხება კომპიუტერით უზრუნველყოფილი შინამეურნეობების წილს, რეგიონში შესაბამისი ტექნიკა მოსახლეობის მხოლოდ 41.4%-ს აქვს, 58.6% კი კომპიუტერს არ ფლობს.

საქსტატის ცნობით, წელს ქვეყნის მოსახლეობის მიერ ინტერნეტის გამოყენების მაჩვენებელი 91.5%, ხოლო კომპიუტერით სარგებლობის წილი - 57.6%-ია.