ჭუბერში ადგილობრივების ნაწილი გზის რეაბილიტაციას ითხოვს. მათ საგერგილის ხიდის მიმდებარე ტერიტორია გადაკეტეს. ამის შესახებ პოსტი და ვიდეო სოციალურ ქსელში მოქალაქე ვიკა ფილფანმა გამოაქვეყნა.

ის წერს, რომ ჭუბერის ცენტრალურ მონაკვეთზე სიარული ადამიანების სიცოცხლისთვის საფრთხის შემცველია და ხალხი იმსახურებს ადამიანურ პირობებს.

"ამ ადამიანების მოთხოვნა არის ლეგიტიმური. სხვა გზა მათ არ დაუტოვეს და ამ ფორმით უწევთ იმ საბაზისო მოთხოვნის გაჟღერება, რომელიც ნამდვილად ეკუთვნით მათ. ჭუბერი სვანეთის ერთ-ერთი მნიშვნელოვანი სოფელია. აქედან გააქვთ დიდი რაოდენობით ხე-ტყე, შენდება ჰესი. როდესაც ჰესის მშენებლობა დაიწყო, მაშინ საზოგადოებას დაჰპირდნენ გზის რეაბილიტაციას. მას მერე, ალბათ, სამი არჩევნები გავიდა და ყოველ არჩევნებზე ადამიანებს უწევთ იგივე დაპირების მოსმენა", - ამბობს ვიდეოში ის.

მისვე ცნობით, იქ რამდენიმე ავტოსაგზაო შემთხვევა მოხდა და განსაკუთრებით, ღამის მონაკვეთში რთულია გადაადგილება.

მესტიის მუნიციპალიტეტის მერმა კაპიტონ ჟორჟოლიანმა რადიო "ათინათს" უთხრა, რომ ამ საკითხზე მოსახლეობას არასწორი ინფორმაცია მიაწოდეს და აღნიშნული გზის რეაბილიტაცია უკვე დაწყებულია. მისივე თქმით, აქციის მიზანი რეაბილიტაციის პროექტის პოლიტიკური მიზნებისთვის გამოყენება იყო.


ფოტო: ვიკა ფილფანის ფეისბუქ გვერდი