2024 წლის 2 სექტემბერს, საქართველოს პროკურატურის მიერ გამოტანილი დადგენილებით, სამეგრელოს რეგიონში პედოფილიის ბრალდებით დაკავებულ მამაკაცს ბრალდება სექსუალური გამოძალვის, სექსუალური ხასიათის სხვაგვარი ქმედების იძულების და გარყვნილი ქმედებისთვის დაუმძიმდა. ამის შესახებ ინფორმაციას სპეციალური საგამოძიებო სამსახური აქვეყნებს.

უწყების ცნობით, დაკავებულმა 8 დანაშაული ჩაიდინა. მან გამიზნულად შექმნა ყალბი "ფეისბუქ" და "ინსტაგრამ"ანგარიშები, რისი მეშვეობითაც სისტემატურად უკავშირდებოდა საქართველოს სხვადასხვა ქალაქში მცხოვრებ 10 წლიდან 18 წლამდე ასაკის ათეულობით გოგონას, მათ უგზავნიდა 15 წლის ასაკის ბიჭის ფოტოსურათებს, ეცნობოდა როგორც მათი თანატოლი, მოიპოვებდა ნდობას და აიძულებდა მათი ინტიმური შინაარსის ფოტოსურათების და ვიდეოების გამოგზავნას, წინააღმდეგ შემთხვევაში ემუქრებოდა ოჯახის წევრების მოკვლით. ასევე აშანტაჟებდა, რომ მეგობრებთან და ნათესავებთან გაავრცელებდა მათ შიშველ ფოტოსურათებს, რომელთაც შექმნიდა მათი საჯაროდ განთავსებული ფოტოების მონტაჟის გზით.

ბრალდებული მიმდინარე წლის 16 ივნისს სამეგრელოში დააკავეს.

"დაკავებამდე, ჩხრეკის დაწყებისას, რ. ქ.-მ დააზიანა საკუთარი მობილური ტელეფონი, თუმცა, ჩატარებული კომპიუტერული ექსპერტიზის შედეგად, აღდგენილი იქნა პედოფილიაში მხილებული ბრალდებულის სოციალური ქსელების ყალბი ანგარიშები, რის შემდგომაც ნანახი იქნა პირად "ჩათებში" არსებული ინტიმური შინაარსის, მუქარისა და იძულების შემცველი კერძო კომუნიკაციის ისტორია, მათ შორის ათეულობით არასრულწლოვან პირთან მიმოწერის ამსახველი "ჩათები".

ბრალდებულის საცხოვრებელი სახლის ჩხრეკის დროს ასევე ამოღებული იქნა სამხედრო დანიშნულების ვაზნები", - ვკითხულობთ ინფორმაციაში.

საქმეზე გამოძიება ამ დრომდე გრძელდება. მამაკაცს ბრალად ედება საქართველოს სისხლის სამართლის კოდექსის 1571 -ე მუხლის 1-ლ ნაწილით, 236-ე მუხლის მე-3 ნაწილით, 139-ე მუხლის 1-ლი ნაწილით, 138-ე მუხლის მე-4 ნაწილის "ბ" ქვეპუნქტით და 141-ე მუხლის 2-ე ნაწილის "ვ" ქვეპუნქტით ჩადენა.

დანაშაული 15 წლამდე თავისუფლების აღკვეთას ითვალისწინებს.

რაც შეეხება დაზარალებულ ბავშვებს, უწყების ცნობით, მათ დანაშაულისგან მიყენებული ტრავმის გასაქარწყლებლად სახელმწიფოს ხარჯით ფსიქორეაბილიტაციის კურსის გავლას შესთავაზებენ. 

სპეციალური საგამოძიებო სამსახური საზოგადოებას სიფრთხილისკენ მოუწოდებს და აღნიშნავს, რომ მნიშვნელოვანია, ყველა მშობელმა გაანალიზოს საშიშროების ალბათობა და გამოიჩინოს მაქსიმალური ყურადღება ბავშვის ინტერნეტთან/გაჯეტებთან წვდომის დროს.

სამსახურში შეტყობინებისთვის ან დახმარების მისაღებად არსებობს რამდენიმე გზა: დაუკავშირდით ცხელ ხაზზე - 199, დაწერეთ განცხადება, პირადად გამოცხადდით თბილისის, ქუთაისის, თელავის, ბათუმისა და ზუგდიდის ოფისებში, ან მისწერეთ სოციალურ ქსელში ან ელექტრონულ ფოსტაზე.