აფხაზეთის თვითაღიარებული რესპუბლიკის ე.წ საგარეო საქმეთა მინისტრმა სერგეი შამბამ დაადასტურა, რომ 1 სექტემბრიდან რუსეთმა ოკუპირებულ აფხაზეთს დაფინანსება შეუჩერა.
მისი თქმით, მოსკოვში არაერთხელ განაცხადეს, რომ „აღებული ვალდებულებების შეუსრულებლობამ შეიძლება გამოიწვიოს გარკვეული სანქციები“, წერს „აფსნიპრესი“.

„ისინი უკვე ამოქმედდა 1 სექტემბრიდან, მოგეხსენებათ, გარკვეული სოციალური დაფინანსება უკვე შეჩერებულია, რაც ეხებათ ექიმებს, მასწავლებლებს, ძალოვან სტრუქტურებს და სხვა. ნათელია, ეს პირველი ასეთი ნაბიჯებია, გარდა ამისა, დგას საკითხი, რომ ამიერიდან ელექტროენერგიის იმ ნაკადში, რომელსაც ყოველ ზამთარს ვიღებთ, კომერციული ფასი უნდა გადავიხადოთ“, - თქვა მან 3 სექტემბერს გამართულ ბრიფინგზე. 

შამბას სთხოვეს, კომენტარი გაეკეთებინა კოზაკი-ბჟანიას შეხვედრის პროტოკოლის ავთენტურობის შესახებ. მისი თქმით, აფხაზი ლიდერი ასლან ბჟანია რუსეთის პრეზიდენტის ადმინისტრაციის უფროსის მოადგილეს 19 აგვისტოს შეხვდა, პროტოკოლი კი 26 აგვისტოს შედგა.

„ამ დოკუმენტის დაწერისას ჩვენი პრეზიდენტი აღარ იყო, ამიტომ ვერც ამას დაადასტურებს. პრეზიდენტმა ერთადერთი, რაც გააკეთა, ის იყო, რომ საკითხავი ის იყო, რომ რაღაც ვალდებულება აიღო, რომ ასეთი რამ არ არსებობს. ეს პრეზიდენტის ვებგვერდზეა განთავსებული, შეგიძლიათ წაიკითხოთ“, - განაცხადა შამბამ. 

მისივე განმარტებით, სოხუმში ცდილობენ ვითარებაში გარკვევას, რადგან „ოფიციალურად“ დოკუმენტი არ მიუღიათ. 

„მას ვერ განვსაზღვრავთ, ნამდვილ დოკუმენტად, თუმცა საკითხები, რომლებიც იქ დგას არაერთხელ გაჟღერებულა სხვადასხვა შეხვედრებზე“, - დასძინა შამბამ

მან კომენტარი გააკეთა ასევე ე.წ. პარლამენტის ზოგიერთი წევრისა და ოპოზიციური პოლიტიკური ძალების წარმომადგენლებისთვის რუსეთის მოქალაქეობის ჩამორთმევის შესაძლებლობაზე. შამბამ აღნიშნა, რომ დღევანდელ მსოფლიოში მოქალაქეობის ჩამორთმევა სრულიად მიღებული სანქციაა.

რუსეთ-საქართველოს ურთიერთობებზე დასმულ კითხვაზე, ე.წ. საგარეო საქმეთა მინისტრმა უპასუხა, რომ სოხუმის ინტერესებშია, რომ ისინი ნორმალურად განვითარდეს.

„მე არ მჯერა, რომ რუსეთს შეუძლია აფხაზეთის დამოუკიდებლობის აღიარების უკან დაბრუნება“. 

შამბამ ასევე განაცხადა, რომ ასლან ბჟანია მოსკოვში იმყოფება, სადაც შეხვედრებს გამართავს, არსებული ვითარებიდან გამოსავლის საპოვნელად, რადგან, მისი თქმით, „თუ სანქციები გაგრძელდება წლის ბოლომდე, ბევრი დაზარალდება". 

გამოქვეყნებული დოკუმენტის მიხედვით მოსკოვი სოხუმს შემდეგ პირობებს უყენებს: 

ეკონომიკურ საქმეებზე სასამართლო და საარბიტრაჟო გადაწყვეტილებების აღიარებისა და აღსრულების შესახებ შეთანხმების რატიფიცირება;

რუსეთის იურიდიული პირების მიერ აფხაზეთის ტერიტორიაზე საინვესტიციო პროექტების განხორციელების შესახებ შეთანხმების ძალაში შესვლის უზრუნველყოფა;

რუს ინვესტორებისთვის შეზღუდვების მოხსნა კომერციული უძრავი ქონების ბაზარზე (აპარტამენტები).