მესტიის სოფელ წვირმის საჯარო სკოლის ინგლისურ ენის მასწავლებელი სოფიო ქუხილავა მასწავლებლის ეროვნული ჯილდოს 5 ფინალისტს შორის დასახელდა.

,,ამ წუთას ძალიან დაბნეული ვარ სიხარულისგან, იმდენად ძლიერი ემოციები გამოიწვია ამ ყველაფერმა. ცხადია, ვინც ათეულში ხვდება, რაღაც მოლოდინი აქვს კიდეც, რომ მოხვდეს ხუთეულში. იმდენად ძლიერი მასწავლებლები იყვნენ ჩემს გვერდით, ყველას ჰქონდა თავისი განსაკუთრებული ნიშა. ამდენად, ვინც არ უნდა ყოფილიყო ხუთეულში, ჩავთვლიდი, რომ ღირსეულად არის ის ხუთეულში, რადგან მე ვარ, ეს ძალიან დიდი სიხარულია და ბედნიერება, არ ვიცი როგორ გამოვხატო ჩემი ემოცია,,-  უთხრა რადიო ,,ათინათს'' სოფიო ქუხილავამ.

ფინალისტების ვინაობა დღეს, 9 სექტემბერს გახდა ცნობილი.

ფინალისტებს შორის არიან:

გიორგი ლიპარიშვილი, რომელიც თბილისის მე-6 საავტორო სკოლაში, სახვითი და გამოყენებითი ხელოვნების და ქართული ენისა და ლიტერატურის მასწავლებელია;

ნათია ნარსავიძე, დმანისის N3 საჯარო სკოლაში ინგლისურ ენას ასწავლის;

დიმიტრი პოპოვი, გურჯაანის მუნიციპალიტეტის სოფელ გურჯაანის საჯარო სკოლის მათემატიკისა და კომპიუტერული ტექნოლოგიების მასწავლებელია;

ნათია უჩავა კი თბილისის N126 საჯარო სკოლის დაწყებითი საფეხურის, ქართული ენისა და ლიტერატურის, მათემატიკის, სახვითი და გამოყენებითი ხელოვნების და ბუნებისმეტყველების მასწავლებელია.

გამარჯვებული 5 ოქტომბერს, მასწავლებლის მსოფლიო დღეს გამოვლინდება. გამარჯვებული პედაგოგი ფულადი პრიზის სახით 15 000 ლარს მიიღებს საჩუქრად.

ცნობისთის, მასწავლებლის ეროვნული ჯილდო 2017 წელს დაწესდა.