აფხაზური ოპოზიციური ძალების ნაწილი თვითგამოცხადებული რესპუბლიკის ე.წ. ხელისუფლებას მოუწოდებს „სასწრაფოდ და დაუყონებლივ გამოაცხადოს სახალხო აქცია, რომელზეც „აფხაზეთის მოსახლეობა კიდევ ერთხელ დაადასტურებს რუსეთის ფედერაციასთან სამოკავშირეო ურთიერთობებისადმი თავის ერთგულებას “.
„ეხო კავკაზას“ თანახმად, მიმართვას ხელს აწერენ „აფხაზეთის სუვერენიტეტის დაცვის კომიტეტი, საზოგადოებრივი ორგანიზაციები „აიდგილარა“ და „აიააირა“, ასევე ექსპერტთა ფონდი - "აამტა".

მიმართვის ხელმომწერები აცხადებენ, რომ გარკვეული ძალები „ცდილობენ აფხაზ ხალხს და სამოქალაქო საზოგადოებას დააბრალონ სტრატეგიულ პარტნიორთან, მეგობართან და მეზობელთან ურთიერთობის გართულება“.

„.. რაც ახალ შესაძლებლობებს უხსნის ჩვენს მტრებს მანიპულირებისა და ქვეყნის საშინაო საქმეებში ჩარევის მიზნით. ჩვენ, აფხაზეთის რესპუბლიკის მოქალაქეებმა, არ უნდა დავუშვათ ჩვენს სტრატეგიულ პარტნიორთან ურთიერთობების ესკალაცია. და აქ საუბარია არა ფინანსურ დახმარებაზე, არამედ სტრატეგიულ ალიანსზე, რომელიც დამყარებულია კეთილმეზობლურ ურთიერთობებზე, რასაც ჩვენ ძალიან ვაფასებთ“, - ნათქვამია განცხადებაში.

ინფორმაციისთვის, 1 სექტემბრიდან მოსკოვმა სოხუმს დაფინანსება შეუჩერა. ამის შესახებ აფხაზეთის დე ფაქტო რესპუბლიკის ე.წ. საგარეო საქმეთა მინისტრმა სერგეი შამბამ განაცხადა. მიზეზად აფხაზეთის ე.წ. მთავრობის მიერ შემდეგი ვალდებულებების შეუსრულებლობა სახელდება:

- ეკონომიკურ საქმეებზე სასამართლო და საარბიტრაჟო გადაწყვეტილებების აღიარებისა და აღსრულების შესახებ შეთანხმების რატიფიცირება;
- რუსეთის იურიდიული პირების მიერ აფხაზეთის ტერიტორიაზე საინვესტიციო პროექტების განხორციელების შესახებ შეთანხმების ძალაში შესვლის უზრუნველყოფა;
- რუს ინვესტორებზე შეზღუდვების მოიხსნა კომერციული უძრავი ქონების ბაზარზე (აპარტამენტები).

აფხაზური ტელეგრამის არხების თანახმად, აფხაზმა ლიდერმა ასლან ბჟანიამ რუსეთის პრეზიდენტის ადმინისტრაციის უფროსის მოადგილესთან დმიტრი კოზაკან განიხილა „აპარტამენტების კანონის" მოწინააღმდეგე „დეპუტატებისთვის“ რუსეთის მოქალაქეობის ჩამორთმევის საკითხი. კანონპროექტი , რომელიც ე.წ. პარლამენტიდან გაიწვიეს, ოჩამჩირისა და გალის რაიონებში აპარტამენტების მშენებლობას ითვალისიწნებდა.  ამავე ცნობით, შეხვედრა 29 აგვისტოს გაიმართა და შედგა კოზაკი - ბჟანიას ოქმი. 

გარდა ამისა, მოსკოვი აპირებს სახელმწიფო სათათბიროსა და ფედერაციის საბჭოს მოუწოდოს, მინიმუმამდე დაიყვანონ „აფხაზეთის პარლამენტის დეპუტატებთან კონტაქტი რუსეთის წინაშე ვალდებულებების შესრულებისადმი არაკონსტრუქციული პოზიციის გამო“.