ქალაქ ფოთის ცენტრალურ საფეხბურთო სტადიონზე მწვანე საფარის მოწყობის პროექტირებისთვის, შესაბამისი სამშენებლო სამუშაოების შესრულებისთვის და შემდგომი მოვლა-მოვლა-პატრონობისთვის ბიუჯეტიდან 3 203 150 ლარი გამოიყოფა. შესაბამისი ტენდერი სახელმწიფო შესყიდვების ვებ გვერდზე უკვე გამოცხადებულია.

სატენდერო დოკუმენტაციის მიხედვით, გამარჯვებულმა კომპანიამ სამუშაოები უნდა შეასრულოს საქართველოში მოქმედი და მიღებული საერთაშორისო სამშენებლო ნორმების შესაბამისად, მათ შორის UEFA-ს სტანდარტების და მოთხოვნების მიხედვით.

საპროექტო დავალება კი გულისხმობს: არსებული საფუძვლის დემონტაჟს, ახალი საფუძვლის მოწყობას, დრენაჟის მოწყობას, საირიგაციო სისტემის მოწყობას, ბალახის დაგება/დახაზვას სპეც. ტექნიკის გამოყენებით, მოედნის აღჭურვას (კარი, ბადე, ალმები), მინდვრის საფარის მოვლას (3 თვე, საგარანტიო ვადა 1 წელი), მოვლა-პატრონობისთვის საჭირო ტექნიკის შეძენას (საგარანტიო ვადა 1 წელი).

ტენდერში წინადადებები 24-დან 27 სექტემბრის ჩათვლით მიიღება.

ცნობისთვის, "ფლანგვის დეტექტორის" მიერ 2024 წლის აპრილში მომზადებული კვლევის მიხედვით, ფოთის ცენტრალური სტადიონის რეაბილიტაცია 2013 წელს დაიწყო და მასში დახარჯულია 8.5 მილიონი ლარი. ორგანიზაციის განმარტებით, UEFA-მ გადაიფიქრა 21-წლამდე ნაკრებთა ევროპის ჩემპიონატის ჯგუფური თამაშების ფოთის ცენტრალურ სტადიონზე ჩატარება და ამის მიზეზად არსებული ინფრასტრუქტურა დასახელდა.


ფოტო: ფოთის მერია