სოციალური სამართლიანობის ცენტრის ინფორმაციით, ორგანიზაციამ აფხაზეთში შშმ პირის საქმეზე პრეცედენტული დავა უზენაეს სასამართლოში მოიგო.

როგორც ისინი განმარტავენ, 2021 წელს ოკუპირებულ აფხაზეთში, ოჩამჩირეში მცხოვრებმა მკვეთრად გამოხატული შეზღუდული შესაძლებლობების მქონე პირმა, რომელიც საქართველოს პირადობის ნეიტრალურ მოწმობას ფლობს, შშმ პირებისთვის განკუთვნილი პენსიის მოთხოვნით საქართველოს სოციალური მომსახურების სააგენტოს მიმართა. სააგენტომ კი არ დააკმაყოფილა მისი მოთხოვნა, არგუმენტით, რომ პირი არ იყო საქართველოს მოქალაქე და შესაბამისად, ის სოციალურ დახმარებას ვერ მიიღებდა.

"სააგენტოს ეს გადაწყვეტილება სოციალური სამართლიანობის ცენტრმა სასამართლოში გაასაჩივრა, სადაც ამტკიცებდა, რომ ადამიანის უფლება, ჰქონდეს მინიმალური საარსებო პირობები, რაც პირდაპირ დაკავშირებულია პირის სიცოცხლის და თვითგანვითარების უფლებასთან ისარგებლოს სოციალური დახმარებით, ჰქონდეს ადეკვატური თავშესაფარი და ა.შ., წარმოადგენს სახელმწიფოს პოზიტიურ ვალდებულებას და სოციალური სახელმწიფოს უმთავრეს პრინციპს. ის არ შეიძლება დაუკავშირდეს მაიდენტიფიცირებელი დოკუმენტის სახეს, ან/და იურიდიულ მისამართს", - ვკითხულობთ ინფორმაციაში.

მათივე ცნობით, 2024 წლის 11 აპრილს საქართველოს უზენაესმა სასამართლომ ძალაში დატოვა გადაწყვეტილება, რომლითაც ოკუპირებულ ტერიტორიაზე კანონიერად მცხოვრები ნეიტრალური პირადობის მოწმობის მქონე პირები გაუთანაბრა საქართველოს მოქალაქეებს და მიუთითა, რომ ოკუპირებულ ტერიტორიაზე მცხოვრები ადამიანების, მათ შორის შშმ პირების ინტეგრაციაზე ზრუნვა და საბაზისო სერვისებზე მისაწვდომობის უზრუნველყოფა სახელმწიფოს პოზიტიური ვალდებულებაა.

ორგანიზაცია იმედს გამოთქვამს, რომ უფლებამოსილი პირები ოკუპირებულ ტერიტორიებზე მცხოვრებთა უფლებებისა და სოციალური საჭიროებების დაცვას არსებითად გააუმჯობესებენ.