ზუგდიდში, ე.წ ფრანგული პარკის ტერიტორიაზე ქართველი პოლიტიკური, სახელმწიფო და საზოგადო მოღვაწის, აფხაზეთის ა/რ მინისტრთა საბჭოსა და თავდაცვის საბჭოს თავმჯდომარის, ჟიული შარტავას ბიუსტი გაიხსნა. ამის შესახებ ინფორმაცია ზუგდიდის მუნიციპალიტეტის მერიამ გამოაქვეყნა.

როგორც მერიის ფეისბუქ გვერდზე ვკითხულობთ, გახსნის ღონისძიებას აფხაზეთის ავტონომიური რესპუბლიკის მთავრობის თავმჯდომარე, ჟიული შარტავას შვილიშვილი ლიკა შარტავა, სამეგრელო-ზემო სვანეთის სახელმწიფო რწმუნებულის მოადგილეები, ზუგდიდის მერი და ადგილობრივი ხელისუფლების სხვა წარმომადგენლები ესწრებოდნენ.

ამავე ცნობით, ჟიული შარტავას ბიუსტი ,,ეროვნული ერთიანობის ცენტრ - ჟიული შარტავას საზოგადოების" ინიციატივით შეიქმნა.

საქართველოს ეროვნული გმირი ჟიული შარტავა 1993 წლის 27 სექტემბერს, სოხუმის დაცემის დღეს მთავრობის სახლის დაცვას ხელმძღვანელობდა, რა დროსაც სეპარატისტებმა თანამებრძოლებთან ერთად ტყვედ აიყვანეს და დახვრიტეს. 2004 წელს, მას პირველს მიენიჭა საქართველოს ეროვნული გმირის წოდება. სიკვდილის შემდეგ, ის დააჯილდოვეს ვახტანგ გორგასლის I ხარისხის ორდენითაც.


ფოტო:ზუგდიდის მუნიციპალიტეტის მერია