აფხაზეთის თვითგამოცხადებული რესპუბლიკის ე.წ. პარლამენტს რატიფიცირებისთვის გადაეგზავნა „რუსულ - აფხაზური შეთანხმება“ „რუსული იურიდიული პირების მიერ საინვესტიციო პროექტების განხორციელების შესახებ“ .
ინფორმაციისთვის, 1 სექტემბრიდან მოსკოვმა შეაჩერა ოკუპირებული აფხაზეთის ბიუჯეტის დაფინანსება, მათ შორის, ამ დოკუმენტის დამტკიცების მოთხოვნით.

ე.წ. პარლამენტის მიერ უკვე რატიფიცირებულია კიდევ ერთი შეთანხმება: „ეკონომიკურ საკითხებში სასამართლო და საარბიტრაჟო გადაწყვეტილებების აღიარებისა და აღსრულების შესახებ“.

„ეხო კავკაზას“ თანახმად, აფხაზური ოპოზიციური ძალების ნაწილი საინვესტიციო პროექტების შესახებ შეთანხმების რატიფიცირებას ეწინააღმდეგება. დე ფაქტო ხელისუფლების ოპონენტებმა განაცხადეს, რომ დოკუმენტი მისი ამჟამინდელი ვერსიით „არ შეესაბამება აფხაზეთის ინტერესებს“ და შეიცავს „სერიოზულ ეკონომიკურ რისკებს“.

„პირველ რიგში, ეს შეთანხმება გათვლილია უცხოელი ოლიგარქების 25 წლის ვადით გადასახადებისგან გათავისუფლებაზე. ხელშეკრულებით გათვალისწინებული შეღავათები ამოქმედდება 2 მილიარდი რუბლის ან მეტი ინვესტიციის შემთხვევაში. რისთვის გვჭირდება ისეთი საინვესტიციო პროექტები, რომლებიც მეოთხედი საუკუნის განმავლობაში, ბიუჯეტს ერთი კაპიკითაც ვერ შეავსებს ?!“ - აღნიშნა „აფხაზეთის სახალხო მოძრაობის“ ლიდერმა ადგურ არძინბამ სოხუმში გამართულ პრესკონფერენციაზე.

დე ფაქტო პარლამენტი, სავარაუდოდ, 7 ოქტომბრის სხდომაზე განიხილავს აღნიშნული შეთანხმების რატიფიცირების საკითხს.